ديواني الشعري نايف بن مياس الفريدي

يا غاية المطلوب ياداي ودواي=ياغايةٍ تضفي على كل غايه
يا ضيقة الخاطر وهمي وسلواي=انته نظر عيني وسبة عمايه
ناديتني وانا لفيتك من اقصاي=لملمت احاسيسي وجيت بعصايه
واستبشرة في نية الوصل دنياي=ولاحت بروق الخير وامطر سمايه
ذود الغلا كمل تواليه بحماي=غزيتني واعلنت للغزو رايه
فرحت في مغزاك واهديتك ارشاي=شوفك يكفيني ويروي ضمايه
من قبلكم وانا مع النجم سراي=اقل ما يوصف عن الحال تايه
ماخيب الله فيك عزمي ورجواي=تسارعت من زود حبك خطايه
مديت لي يمناك وامسكت يمناي=الله لا يكتب لحبك نهايه
قصة غلانا يتعض فيه قراي=في سيرة العشاق تصبح حكايه
نايف بن شليويح بن مياس الفريدي

هذي قصيده نشرها الشاعر نواف بن هلال يسندها الى ابن عمه وعدة اشخاص وقد طلب مني الشاعر نواف بن هلال الرد عليها رغم انه لم يذكرني مع من اسند عليهم


هو يقول

يامحمد الدنياء تجارب وميدان=وكلن بهادنياء يدور حصيله
وانا تحصلت العقوبه مسيان=من روس ربعٍ يحتمون الدبيله
يوم ارتكز رمح الغلا بابن نومان=سهماً رماني من ايدين الجليله
شفني من سهوم الهواء طحت مرضان=لازم خويك يامحمد تجيله
قم واركبه تكفى على بنت شقران=حمراً خطاها يامحمد طويله
قبل يجونه بالمساء جيش الاخوان=يتلون ابن حماد شيخ القبيله
شيخاً يبين به السطر وين مابان=تركز له البيضاء براس الطويله
عيال راشد يوم روغات الاذهان=يوفون لابار العميل بعميله
تعرف مواقفهم على مر الازمان=ماهو مجرد عرف يومٍٍوليله
قلته وانا متنحرٍ طير حوران=يزي نياقه من قراح الثميله
منصور مع عظم العرب وبن جضعان=وابو زوايد راح معهم دليله
قولوا لبو يارا سلايل كحيلان=ترا سبب بلواي شقراء جديله
عنق المهاه اللي تقل عين شيهان=تركي على كبد المعنى مليله
ولاني بجابانٍ ولا ولد جابان=بس التقيد بالمذاهب فضيله
مذهب هل التوحيد ذربين الايمان=وانا حفيد اهل العلوم الجميله
الى متى سجن القوافي والاوزان=في خافقٍ بين الظلوع النحيله
اليوم يامحمد فهد كان ماكان=في صفحة كتاب الف ليله وليله
يلين ضلع طويق والراس مالان=اما تشيل الحمل والا نشيله

ورديت عليه بهذه القصيده
يا مرحبا فنان فنان فنان=صغت البيوت النادرات الجزيله
الكامل الله وانت من دون نقصان=حطيت لك تاريخ ما احدٍ يزيله
عديت يا نواف بطويق وآبان=في قمةٍ عن غيركم مستحيله
انا اشهد انك حر مخلب وجنحان=ماخاب قناي الحرار الاصيله
وانا اشهد انك بالمواقف بليهان=لاقام واشتال الحمول الثقيله
تابعت كل احداث غزه ولبنان=وتابعت تجريح الزميل بزميله
متسوطنه بالقدس واخرى بجولان=ياديرت الاسلام يالله عقيله
متاملٍ في قادم الوقت عقلان=وانا دخيل الله وانته دخيله
انا يا ابو وافي من العام زعلان=الكبد يا نواف مبطي عليله
وشلون تلقا لون من كثر الالوان=والطيف سبع الوان وانته تخيله
بغداد منبتها على جال نهران=الكل منهن مايوقف مسيله
واللي مساقيها شغايا وغدران=بشر خضار ازروعها بالذبيله
والحقد والغيره من اطبوع الانسان=خصٍ ليامن شاف خلفه كفيله
خلك حكيم الراي من راي لقمان=وايوب صبره بالليال المهيله
واللي يقدم حجته دون برهان=مرضان والمرضان خلو سبيله
الليث ما يضحك ليا شفت نيبان=احيان تكفي ما يقابل قبيله
لابد ما نبقى حمايه للاوطان=حي الوزاره يحتمي خنشليله
نايف بن مياس الفريدي

تهت يالتايه وضيعت الدليل=لاتطاول ماتطولك الكتوف
تحسبٍ انك شاربٍ من سلسبيل=مادريت انك على بيرٍ جفوف
الضماء قافيك ماتلقا مقيل=ما حسبت الوقت يوم انك تسوف
لاتدس الراس وتشب الفتيل=تمتلك وجهين والعالم تشوف
عشت بالدنيا على قولٍ وقيل=ودك ان الناس حاذف ومحذوف
لالمحت الضول شمرت الشليل=وانت ماتقدر على سل السيوف
ماتفرق بالاصيل من العصيل=تدعي بالدين وتدق الدفوف
لاتقول انك على العالم وكيل=ادري انك هيكلٍ من دون جوف
شفت خرج الراحله مابه حصيل=والجدا تفرك براحات الكفوف
عن دروب الناس دور لك سبيل=والله اللي يشتكاله بالضروف
كان تبغى العلم والراي النبيل=والله انا ماحسبنا للضعوف
مانلد العين بالهرج الهزيل=وان وقفنا ننتف الشارب نتوف
وان تكلمنا وقدمنا الدليل=قالوا العربان فرقت الصفوف
الامر لله والصبر الجميل=يرضي الزعلان لا صار امخلوف
نايف بن مياس

وراك يالغالي قطعت اتصالك=وانا من اول عيشتي نبرة الصوت
مافيه رنه زي رنة حبالك=اسلوب مع منطوق واضح ومخفوت
يعكس مدى حبك بقلبي جمالك=حطمت من زينك تواريخ بيروت
لاهم بني عمك ولاهم خوالك=غدير يطلع به زمرد وياقوت
ليتك صفيت لقلبي اللي صفالك=اسمك عليه من اول العام منحوت
متى على الله نرتوي من خيالك=تروي ضما قاعٍ من العام موقوت
وان كان بالقادم خطرنا ببالك=تراي محبوبك الى سكرة الموت
نايف بن مياس الفريدي

هذي قصيده قلتها بمتكتوب طير الاخ الصديق / سلمان العطيشان بعد ن لحق به على حبارى عقب طيور وجابها وحلف بعد القصيده ان يموت عنده مايبيعه ابد وفعلا مات عنده بعد ثلاث سنين من القصيده

مكتوب لا يعرض على كل طماع=ويكفيه عين اللي قليله وفوقه
يروع معه القلب لااطلب ولا لاع=سم الخريش اللي تبا الغيم عوقه
ماهو بلا راكد ولا هو بطلاع=لاكن ليا طارت وفكت سبوقه
يحرم عليها ماتعدي من القاع=إلا وشلال الدما في شدوقه
راعيه سلمان العطيشان له باع=باعه طويل ووافيٍ في حقوقه
صقار صيته بين كل العرب ذاع=حب الصقاره ساريٍ في عروقه
بالطير والمقناص والذود مولاع=متشاركٍ بالقلب طيره ونوقه
وله مجلسٍ تلقا به الناس جماع=لم الجماعه والاصاحيب شوقه
بينت ما شاهدت بالعين باقناع=والشاهد الله والضماير صدوقه
نايف بن مياس

يا سلام الله مادام الحق شعشع نوره=والله اللي يهدي الغاوين نعم الهادي
كل واحد يا خذ اللقمه حسب حنجوره=لاتطوف ايديك يا هذا الفتى بالزادي
ومن يشوف انه تعلى يخدعه ناضوره=يحسب انه فوق بالقمه طلع بالوادي
ومن يقول انه هو الفنان ملك الكوره=والله اني لاخذ الهداف يانقادي
ينكشف لا ولع الدوري قدم جمهوره=والنهايه موقعه معروف باب النادي
البليد اللي تعذر يمسح السبوره=الله اللي يعطي التوفيق حضه رادي
ماجهلنا بالسوالف كلها مخبوره=لاتقول اللي يشب النار غير ازنادي
لو شهد له بالنزاهه جاره السنيوره=خابرينك ماضي الايام يالموسادي
والله مانداري خطراً مكسوره=من يقول ان خاطره مكسور عندي عادي
ومن يعدي تالي الايام بالمقصوره=يستحق انه يمثل ديرتي وابلادي
نايف بن مياس

ياللي دخلت القلب مافيه حارس؟=هذا حمى للناس لا تستبيحه
قلبي شديد وهايبه كل فارس=خارت قواه اليوم وانته نطيحه
تحطمت قدم العيون المتارس=والضحكه اللي كملت في مطيحه
العب وفي محمية القلب مارس=ياريم لك ضله وتينه وشيحه
لاحر في جوه ولا برد قارس=فيه السعاده والحياه المريحه
درستني بالحب مثل المدارس=وريتني جور الليال الشحيحه
عنتر يعد من الدهاه الاشارس=راحت حياته تحت كف المليحه
وان كان يجني كل زارع وغارس=انا تكفيني من الورد ريحه
نايف بن مياس

وهذي بالاخ / منصور الوسوس المشرف العام على منتدى الفرده

التحيه تقدم لابو يارا=عز من يعتزي به بالشدايد
دون ربعه من الناس الغيارا=واحترام القبايل والبدايد
انتهج درب جدانه وسارا=والمدايح تقلدها قلايد
التواضع على صدره شعارا=تحت ربه عن الاقران زايد
مانوفيه حقه باختصارا=صدق من قال بالضلعان نايد
انت منصور دايم بانتصارا=رايدٍ في سماتك وانت رايد
جتك مني تحيه واعتذارا=تدري اني على سلم وعوايد
والمجادل للاخلاق اختبارا=مايزعل وسيعين البنايد
والتفاهم يزودنا وقارا=والنتيجه مع الراي المحايد
ماعلى السفن من موج البحارا=ولا على طويق من هب النوايد
داجي الليل يجليه النهارا=والبراهين ميثاق الوكايد
وانت حرٍ تكفيه الاشارا=مرضي الناس يا منصور كايد
نايف بن مياس

يازين ليه الغياب-كنا بكم واثقين=صدقت بي زورها
فكيت للهجر باب -يافرحت الشامتين=ساهمت في دورها
هذا عقاب الثواب -ارحل يا ابو نيتين=نفسي وذا شورها
موعدك يوم الحساب -لابعثو العالمين=تلقاه بسطورها
الحب ذنب وعذاب -قد عذب الاولين=دنيا ومعمورها
يهاب من لايهاب -حتى امهر السابحين=مايعبر ابحورها
يا ما تبعت السراب -ضميان والعد وين=ماطلت غيورها
ضيقه وزود اكتئاب- مافيه مستانسين=الشوك بزهورها
شيبت وانا شباب -عشرين نص اربعين=مابان مستورها
ضنيت والضن خاب -وصفقت بالراحتين=الناس ياجورها
يابخت من عنه تاب -واصبح من الواعضين=للناس ويزورها
واصدر بدوره كتاب -يا معشر العاشقين=من مات معذورها
نايف بن مياس الفريدي

سمعت صوت الحمام اللي ينوح الصباح=وذكرت حبي قبل عامين باسهابته
كنت احسب انه على ماقيل لاراح راح=واثر المحبه على طول الزمن ثابته
ماعاد تثر عليه التعريه والرياح=والشمس ماغيرت من لون جلبابته
الصاحب اللي غزى قلبي وصار اجتياح=لقا الدفاعات هشه قدم دبابته
رفرف علم حبنا وياه لاكن طاح=وانا احتفظ في عهود الود بكتابته
واليوم عايش بعصر العولمه بانفتاح=كن االبشر كلها من فوق سبابته
ياليت جرح المشاعر مثل جرح السلاح=يعرف علاجه ويعرف داه واصابته
ياصاحبي دوك همسه لو قطعت القراح=شجرة غلاكم بقلبي نابته نابته
نايف بن مياس الفريدي