مـرثيـة سبيـل بن سنـد - رحمـه الله -

04-08-08, 02:38 PM

يوم الثلاثاء يا نهار رزاياك= غارت علينا بالسيوف الصقيله
من لييلتك تجمع طوابير بلواك= وحنا نحسب ان الليالي ذهيله
بكيتنا وانته مع الناس ضحاك =وياما ضحكنا..والرجاوي ضليله
امنت بالله رب الاقدار خلاك =يوم بغيض يذهل العقل ويله
من يوم حارت بالسما نجوم الافلاك= وغاب القمر .. واغدى طريقه دليله
وتاه الرجا واللي تبي راح يقداك= في منزل كل النفوس تعدي له
يابو حمد ركن الوفا جاه دكاك= من يوم بيت الطيب ولا سبيله
من يوم بيت الطيب بالطيب عزاك= ماله عليك الا الدعا في مقيله
يا بيت ابو سلمان وشلون ننصاك= واللي نبي للحق وجه رحيله
حسه بقلبي كل ماجيته هناك= القى هلا واهلين والقى الجزيله
في مجلس مافيه نذل ولا افاك= غير المراجل كنها ريح هيله
فعله يصدق هرجته يوم يبداك= وهرجه يصور طيب قلب يشيله
ما تسمع العورا ولا هرج يزراك= وزود على التقدير تكسب نفيله
ليا سبيل الخير هو وين نلقاك=هو وين نلقا مثلكم ننثني له
حمل الهوى يبكيك يا ملاق الادراك= ويبكي سحاب الجود فرقا عديله
وتبكي عليك قلوب بالحيل تدراك=ويبكي عليك الشوق نقض الجديله
ويبكي عليك الخير والطيب ناداك= وردت صداه حمول نفس ثقيله
حتى القصيد ارتاع في ليل مسراك= وغابت عيونه .. والمشاعر تخيله
يابو البلاغه تنتعش في شفاياك= يابو اللحون وكل صوره جميله
ما شافو الشعار بالسوق شرواك =جزل الملافظ والمعاني جزيله
فارقتنا وانته مع الناس طرياك= ذكرك حفر بالقلب عز القبيلة
من بعد ابو سلمان يا قلب يفداك= من بعد ابو سلمان يروي غليله
من بعد ابو سلمان ياثوب يرفاك= لامن سموم القيظ قرت شليله
ليا سبيل الخير ياشين فرقاك= كبدي علك اليوم حرى عليلة
وزود لهيب القلب سلمان يمناك= روح معك واسهر عيون كليله
انا اشهد انه في سجاياه حلياك =نفس عزيزه والمواقف مثيله
انته كتابه ناجحٍ به ويقراك= صبح ومسا في كل يوم وليله
لين الطريق اغبر عقبك وخاواك= يم المرابع والسنود الطويله
مار الوفا موصول مع باقي ابناك= اهل المراجل والدعاوي الجليله
عقيل وثلاب هم ساس علياك= واخوانهم .. بدروب قرم اصيله
لعلهم بالطيب يرقون مرقاك= ما مات من ورث حسانيه جيله
وانتم عساكم في تساهيل مولاك =بالمغفره .. كل يسره حصيله
يالله عساهم في مداهيل حسناك= مستانسين وطايلين الفضيله

الشاعـر / محمد عبدالله العود الفريدي الحربي 22/1/1418