لكل عشاق الشاص هذه الابيات

السلام عليكم ورحمة الله وبركاته
بسم الله الرحمن الرحيم


لكل من يعشق الجيب الحوض اهديه هذه القصيده وهي للشاعر

حمد السليمان العليان التميمي

بالجيب (الشاص)

يا للي تعيب الجيب للجيب مقدار =مدري تسبه صدق والا إنت مقهور
من كلمتك أصبحت أنا اليوم محتار =مدري شربت القاز وإلا انت مخمور
ولا لكسزن عندك ولا جيب فكسار=ومنتف وحافي وبدعاك مثبور
والثوب فاضي ما دخل فيه دينار=غير الورق والمرت بالثوب مذكور
اسمع كلامي ناظمٍ فيه الأشعار =ومن نظم أبياته على الحوض معذور
الحوض شده مصنعٍ فيه شطار =ما شده الكوري أبو كف مفتور
شده من اليابان مسمار مسمار =من مصنع التايوت ما شج بقصور
قال البلى بالحوض بالدوم نكار=قلت الحلى بالحوض لا جاه منكور
الحوض عشق اللي يحبون الأقفار=والحوض للي يقني الطير مجبور
واللي يحب البر مع شبة النار =قرمٍ هو أوي بالفعل دوم خبور
ما هوب للي موقفه داخل الدار =وحطه على ما قيل منظر وديكور
وسط البلد ممشاه ما يفارق القار =من عقب ما هو مركب لكل منعور
وإن كنت ما تفهم نوافيك الأخبار =عن مركبٍ للجيش حطوه مأمور
وحطو على شاصيه مدفع وردار =لجله يشيل الحمل لو كان معسور
ولجله على ضيم السوايق صبار =يصبر لو إنه بالمصاغيب مكدور
مثل الجمل يصبر على حمل الأسفار =يثور في حمله لو الساق مبتور
له وقفةٍ من شافها دوم يحتار =يأخذ نظرك ويأخذ العقل مخطور
وياقف كما حرٍ على كف صقار =شفقٍ على الملواح له عدت اشهور
ولا كما ذيب مواريه غدار =شاف الفرايس وأصبح الحال مسحور
ياما حلى به طلعتٍ وقت نوار =فتح نفلها والخزامى له ازهور
الفين ترخص له كثيرات الأسعار =من وردة حاز التحية ومشكور
ما حط له قير الدبل ضغط وزرار =ولاحط له بين المقصات خابور
حط الشنب بالوجه وللسحب شنكار =والونش حطوله على الوجه ماطور
وحطوبه الدفلك على الزر دوار =أربع تواير لا ضرب جال ووعور
لا يا محمد وش بقى فيه ما صار =بيج وخليجي صرت أنا فيه مسحور
لا شفت ما بالجو من عج وغبار =والمزن بانت والخلى صار ممطور
جهز به الثايه ومع البن مسمار =ومن الورق سيلان على النار محكور
على الحطب سوه وعلى حافت النار =ما هو مخدر وسط مطعم ودافور
وخذ لك من عيال الأجاويدٍ الأخيار =رجالٍ تنومس ما بها طبع مغرور

منقول ]
اطيب تحياتي/طلال بن نواف

يستاهل الشاص

وصح لسان الشاعر

وسلمت يمينك على هذا الإختيار

اخوى طلال النواف
تسلم ويستــــــــــاهل الشاص وصح لسان الشاعر
تقبل مرورى وتحياتى
تحياتي للجميع

صح لسان


الشـــاعر ومشكور

على


النقــــــل