لعلكم تتذكرون قصيدة الوجيه / نافع بن عوده بن هديب التي وجهها قبل فتره
الى الشيخ زيد وذلك عندما هاجت قريحته بعدما تذكر من رحل من
كبار رجال الفرده ومشاهيرهم عن الدنيا وهي المعنونه بـ (نعي الرجال للرجال)
لا والله الا برّك الزمل يازيد=والحمل ما ينشال فوق القعودي
راحوا صناديد الرجال البواليد=وجدي عليهم ليتهم بالوجودي
وجدي عليهم وجد من طاح بالبيد=صكّن عليه مجنزرات اليهودي
اليا ذكرت افراق هاك الاواليد=يا مير والله جرْح قلبي يزودي
رجالٍ لهم في صفحة المجد تخليد=مجدٍ تليدٍ ورّثوه الجدودي
وقد جارا هذه القصيده عدة شعراء، قصائدهم موجودة لديّ سوف تجدونها ان شاء الله
جميعاً في مجلس المساجلات قريباً
وهنا اضع بين يديكم رد الشيخ زيد على تلك الرائعه من روائع ابو بدر وذلك لان
مايخطه يراع ابن عوده وهو من خيرة رجالات الفرده لابد ان يكون له دويٌ بين
الجميع خصوصاً وقد تطرق الى موضوع يهز الوجدان كلما قيل رحل فلان ممن
كانوا يملئون الدنيا قولاً وفعلاً .
(قصيدة أبو محمد رداً على نافع بن عوده )
يابو بدر في ليل سادس من اثنين=في بيت ابو شايم رحيب الجنابي
اخذ وعطا حتى مضى الليل ثلثين=في بيتك الصايب ووضع الكتابي
يحفظ لنا تاريخ رجالٍ عزيزين=منهم صناديد القبايل تهابي
فرسان كون وبالمجالس سلاطين=ياللمصيبه !! ماقدرْها المصابي
من افضل هل الدنيا وخيرة هل الدين=كلٍّ كسب سيرة شبابه وشابي
فيهم صفات اثنين شارات ثنتين=عنتر وحاتم واستقامة صحابي
قبل الشهير اليا رحل دونه الفين=الفين عامٍ بعد وارى الترابي
كنّه مع اللي يافتى الجود حيين=ماكن شمسٍ بعد موته تغابي
رجالٍ مدارسهم مجالس دواوين=الشيخ يروي للكهل والشبابي
والكل منهم للروايه ملمين=وكلٍ يقدم له سؤال وجوابي
واليوم لو هو حي ما الناس دارين=بين الحطام وبين بنك المرابي
والبعض عن طيب الرجوله بعيدين=فرقه عن الخفرات بيض الثيابي
وفي رايهم لو قيموا له موازين=الهيلعي فضّل عليه الغرابي
ولو هو علم قدره براي المساكين=يموت ثاني لو يجيه المنابي
والطيب عسرٍ واهل الطيب عسرين=وعن السهل في شامخات الهضابي
ويابو بدر شف المنازل نظر عين=وهلّت كما هلّت حقوق السحابي
قلت ليتني ماجيت مع ناس ناحين=ماشفت ديرتهم وخال الجنابي
يادار وين اللي على العد طوفين=وين النشاما وجاليات العذابي
وين الدلال اللي على النار صفين=وفنجالهن يشدا حَمار الخضابي
وصحون فيهنّ الغنم والبعارين=ليا ما اكفن الخرفان سرد الرقابي
وقب الاصايل ياملا وينهن وين=وين الرجال وخيلهم والركابي
وين الرجال اللي تضد المعادين=وسيوفهم ورماحهم والحرابي
والحاضره في نجد تبني دواوين=يابو بدر صارت دمار وخرابي
ولمدوّحاتٍ في وطن نجد بانين=كم خبّةٍ فيها قرى البيت نابي
الواحد يسوا الف جامع ملايين=جمّاع مالٍ للفنا والذهابي
لاخير بالدنيا ولا خير بالدين=حصيلهم منها التعب والعذابي
عنّا رحلوا بين النصايب مقيمين=والله يرحمهم نهار الحسابي
بديرانهم رعيان للابل والضين=خيمه وسوداني وهندي يبابي
من شوفهم سبب مرضنا سنتين=حزنٍ وهمّ وبالضمير التهابي
وترى البقا لله والناس فانين=ناسٍ كما رحلة ذهاب وايابي
وانته وانا من خلفهم قاب قوسين=لاهرّفت شمسٍ غطاها الغيابي
وحنا على السنه على الدرب ماشين=تعال شارك بالسفر والزهابي
بمسجد رسول الله فروضٍ مصلين=والجمعه اللي به عظيم الثوابي
جمعه مثل ماقيل :حجّه لمسكين=وحنا بحاجتها نهار الحسابي
ويابو بدر ماتدلنا ناس غادين=ولا يغرنا الضحضاح واصله سرابي
واليا سمعت الضايعه والمضلين=قل الله اعلم بالخطا والصوابي
نترك لناسٍ تخلط الزين والشين=شبنا وقرّب نجمنا للغيابي
فحص وقياس ومختبر مع موازين=نستبعد السلبي وناخذ ايجابي
واقسمت بمنزّل تبارك وياسين=ان كان عيبٍ حب ربعي عيابي
والشكر لله ماسكين القوانين=شيمه وسنّه من ليالي شبابي
شيمة عرب مع نص شرعي من الدين=والله يوفقنا لهدي الصوابي
ولا همني مالٍ يهم المساكين=باليسر والشدات تبلج نيابي
رزقي على اللي خالقي ثم محيين=نعم الوكيل اللي عليه احتسابي
العرض الشجري
