هذه القصيدة من جديد ابو فهد سعد بن هذيل القاها بمهرجان أوثال والقصيدة رائعة
وحبيت تطلعون عليها
بسم الكريم بدايتي خير الأقوال=الخالق الرازق عليه اعتمادي
سبحانه العالي على كل متعال=اللي له المسلم يمد الأيادي
يا منزل سورة تبارك والأنفال= تجعل لنا التوفيق ياخير هادي
يارب تهدينا على خير الافعال=وتدلنا درب الهدى والرشادي
ياقاضي الحاجات ياعالم الحال=من باب فضلك مايخيب اجتهادي
ومن بعد هذا قلت في جزل الأمثال=لجل الرجال نقول جزله جدادي
نختار من جزله والأحكام تنقال=وطيب الكلام يساق لجل المنادي
سعد داعني قلت لبيه بالحال=في مهرجان أوثال حيثه سنادي
من لابتي درعي سياجي عن اللال=بالعزوة اللي نلتقيها بحادي
يابن الرجال اللي لهم ذكر وفعال=لجلك ويمك نترك الشغل عادي
من العاصمة سقنا الركايب للاميال=يم القصيم نحث لجلك جوادي
من العارض المنقاد والفكروالبال=متوجهه لوثال غاية مرادي
نبي نشارك بالفرح كل رجال=بازكى السلام وبالتحيات بادي
سلام يالحضّار في حفلة أوثال= سلام ياهل أوثال ياهل المبادي
سلام يادار الوفى دار الأشبال=ياوارثين المجد حضر وبوادي
تحية الاسلام بكبار واجلال=على الحضور أقولها من فوادي
تحية تضفي على كل منزال= يذيعها المذياع في كل رادي
ياديرة التاريخ يادار الابطال=ياديرة الشجعان واهل الهنادي
متوارثين المجد ميراث الانجال=ياهل العقول النيرة والسدادي
يامكرمين الضيف والهيل بدلال= من وقت عنتر والحطيئة ينادي
يشهد بها التاريخ وكتاب رحال=ويشهد بها الشعار علمٍ وكادي
طابت لياليكم والأفعال تنقال=في مهرجان الصيف ذكره يشادي
ويرتاده أهل الدين والفكر والمال=ويصير للألباب مجلس ونادي
ويجمع وجوه الخيروكرام الاسبال=ويجمع شباب المملكة بالنوادي
وكان النصيحة للملا تباع بجمال=نصيحتي مجان في ورد كادي
ترى الفراغ بوقتنا اليوم قتال=خصٍ على الطلاب شره نكادي
حاذور يالمنعور يامعرب الخال=اوصيك عن تيار فكر المعادي
أحذر تعيل ولا يخاويك من عال=وعن رفقه الأشرار خلك حيادي
أحفظ عمود الدين في كل الأحوال= وعلى الفروض الخمس خلك حدادي
شوف الحوادث حولنا اليوم تجتال= والمغرضين تجوب في كل وادي
تزرع سموم الحقد في روس جهال=زمرة خوارج جعلها للنفادي
وتغرر الجهال في سيرة الضال=مرضى القلوب اللي غشاها السوادي
ناس تخفى بالبلد صورة ازوال= مغسول مخه ضايع العقل غادي
يابن الوطن لأبن الوطن كيف تغتال؟؟=وعلى وطنك تشب ملح الزنادي
أمرك عجيب وفيه الالباب تهتال =ويبقى سواله للزمن والتلادي
الله يديم الخير لبلادنا فال=وعاش المليك اللي يضد الاعادي
تاج العروبه شامخ الراس حلال=حاكم وفي حكمه تفاخر بلادي
عبدالله الضرغام شيال الاثقال =عز الوطن والدين والامن سادي
لو ميل عقاله ولا لصعب مامال= من دون مكة والمدينة يفادي
وسلطان سلطان الرخى قاد الارتال=قايد سطول الجيش عد وعتادي
وتحيتي تبقى على راسي عقال= لفيصل ولد بندر كريم المبادي
واختامها صلو على خير مرسال= اللي شرع للحق صوتٍ ينادي