يا نايف القلب عيا لا يطاوعني = يمشي مع المقفي اللي طال ترحاله
وش حيلتي ياصديق الصدق صارحني = ياكيف أبقدر على التوديع وأحتاله
مرت سنين العمر والهجر ذابحني = أقول عادي وأنا والله ما أقوى له
يانايف الهجر منه مابدر مني = وش حيلتي والخفوق اسنين مدهاله
ذبحني اللي بوصله صار قاطعني = يوم إنقطع عن جميع البث برساله
مايدري إن السهر والهم جارحني = مايدري إني أعيش الحزن بإهماله
يانايف إن كان بالتقصير ظالمني= إنشد عن الوصل جوالي وجواله
ياما سهرنا الغلا والشوق سامعني = ياما تغنى الخفوق بصوت مواله
واليوم مدري علامه ما يريحني = وش فيه مدري وش اللي صار في حاله
فجأة من الصوت صار اليوم حارمني = فجأة فقدته وقلبي فاقد وصاله
يانايف الهجر بين اثنين وش يعني = وش يعني الهجر دام الروح تبراله
شكيتلك ياصحيبي مير سامحني = صاحبك كل الحزن موجود في باله
وهذا رد الشاعر:
نايف الناهي الشمري
ما كل شخصٍ يشـد القـاف يعجبنـي=ولا كل من يطلـب الفزعـات يعنالـه
كن الذي (يسنـد القيفـان) يطلبنـي=ولو كان يطلب هـوى بالـي بيهدالـه
هلا بالـذي يكتـب القيفـان يندبنـي=الصاحب الي أبد ماغبـت عـن بالـه
هجر الولايف على ماقلـت : ذابحنـي=وأشوف خِلّك على الهجران في فالـه
لاتشتكي لـي تـرى قافـك يعذبنـي=وأشاطرك همك وعرق القلب يدمالـه
إن كنت تبي النصيحه هاك واسمعنـي=حيثي عبرت الجبل بالحـب وأسهالـه
حال الوفاء في وقتنا ماهـو بمعجبنـي=وراع الوفـاء ياصحيبي ضاع مقيالـه
أجف الذي جافاك لـو قلـت يقتلنـي=وأعط الغلـى للـذي يآفـي ويسعالـه
وأنا أشهد إنك (وفي) دايم وتعجبنـي=شهادةٍ تشغـل المديـون عـن مالـه
الي يبيعـك (بعـه) لاتهـدم المبنـي=والـي عطـاك الغلـى بالعـز يبنالـه
((هذا كلام الذي يزرع القيفان ثم يجني=بالتجربـه ماخلـط عِرفـه بجهالـه))
وأرجوك في ختمة المرسول تعذرنـي=ياشاعـرٍ (يضفـي الشعـار بجلالـه
يانايف القلب عيا لايطاوعني 
العرض الشجري
