حبيت راس عبيد من طيب قافه=عز الله ان عبيد بالشعر بيطار
ياسامعي كانٍ عندك حرافه=لاضفت الالف لوالده يطلع انهار
يازين نظمه للمثل يوم حافه=تقول من غال الجواهر والادرار
الشرّد الفرّد عسفهن عسافه=اللي لهن عند اهل العرف مقدار
والا قليل العرف عنده حسافه=وراع الولع ياعبيد عنده لهن كار
الجوهر الغالي صعيب اكتشافه=كود الذي مثلك بعيدات الاوكار
يابعد بالشعّار فرق المسافه=لاشك مايدرون عميان الابصار
احدٍ بنظم القيل عنده كلافه=واحدٍ اليا من قال قيله طلع عار
بعض قصيد اليوم نفسي تعافه=لامبينٍ حكمه ولافيه تعبار
كل الكلام اللي يجيبه سخافه=في فكرتي لوتختلف فيه الافكار
وسلمت يامن شاقني صوغ قافه=من غيهبٍ جوهر معانيه فوّار
ياعبيد كل اللي تقوله طرافه=الله يبقى فيك ياواف الاشبار
يابو محمد ياحريب الضعافه=ارج السموحه منك يانسل الاحرار
وعداد مايسعى وكمّل طوافه=ازكى سلام لقايد الغر الابرار

قدر الوفاء ياحمود ماهي زهافه=ومن طيب ذاتك يابعد كل قمار
ابيض احساسٍ ناصعٍ مع نظافه=ميدان ميراد المشاعر ومصدار
لبّستني تاجٍ على الراس شافه=اللي حضر واللي قراهن بالاسطار
روايعٍ من نقد سوق الصرافه=واحد وعشرين الذهب قيس وعيار
منظوم برديٍ ويحمل اغلافه=توقيع يمنىً ما تجيها سنى النار
يمنىً تجود بوقت قاسي اعجافه=يمنى حمود الطايله سر وجهار
ياريف هتاشٍ من البعد ضافه=يوم الردي لاضافه الضيف يحتار
الشعر زهره قد قطفته قطافه=قبلي نظمت من اجزله عذب الاشعار
بحرٍ تباعد غبته عن طفافه=اليا صفق كنه غضب ريح الاعصار
من زرق غبات المحيط اكتشافه=بمتابعة عبر الفضاء كل الاقمار
مامر في دربه تمثنى وطافه=عنه اعلنوا حال الطواري والانذار
لك في رجومه وقفةٍ وانحرافه=ولك في صحاريه البعيدات معبار
تصوغ جزلاته بليا كلافه=ماتجبر المعنى بتركيبه اجبار
ولولا التضارب بالنظر واختلافه=كان السلع بارت وسوق السلع بار

بسم الذي امره بنونه وكافه=ربٍ خلق متكفلٍ رزق الابشار
نرجيه ونطلب رحمته والمرافه=بيومٍ عبوسٍ شاخصه فيه الابصار
من بعد ذكره نستعين ونخافه=ونساله التوفيق مع كل معبار
وهيضني المعنى بدون انجرافه=ولاني من اللي يدفعه كل تيار
قافٍ لبو ناصر جديد الصرافه=وعن عملة الليرة تخيرت دولار
اللي نظم له قاف يازين قافه=ويازين نظم القاف في بدع الاشعار
صبت الهدف ما اخطيت قول النصافه=بالاوله والثانيه زحت الاستار
بعض الكلام لاجاك فيه الجحافه=بالمدح والا القدح ما عنه يندار
وعن جائزة نوبل كفتنا الصحافه=وانا اتكلم عنه موجز بالاخبار
تبا الصراحه شد قافه وحافه=وسكر مجال النقد عن كل هذار
هذي شهادة حق ما هي لقافه=ياعبيد لك مني تحيات ومجار
وشهادة العرّيف علم وثقافه=ياعبيد تماري بها بين الاقطار