ياسايق الموتر تعد الإشارة = لا ولعت خضراء وعقبه لك اسفار
واصل مع الخط السريع ومساره = اللي من بريدة سريعٍ لسنجار
انسف وثال يمين والعلم شاره = وعنك الجواء وعيونها حدر ويسار
وفي زاوية تسعين مع راس قارة = يفرق يمينك خط عابر من القار
خلك معه حتى تطب القوارة = عسى تساقيها هماليل الامطار
دار الوفاء والجود دار السطارة = اللي بها ربعي وفيين الأشبار
عيال راشد لاشعل الحرب ناره = عزي وفخري لا احتمى الموقف الحار
ديور مع الدوار وانص الإمارة = قصرٍ مشيد ماله أبواب واسوار
ماغير ديوانٍ يعجعج بهاره = وطيبٍ يفوح مع الهواء كل مادار
وصفت دلالٍ في مجاذي وجاره = ينساق والمهن على الربع الأخيار
وسوالفً ماهي سوالف دشاره = سوالفٍ تجلا عن الكبد الامرار
وحيلٍ تقلط كل ليل ونهاره = من كل جلابٍ لو يزود الأسعار
اسلم وسلملي سلام بحراره = على الحضور بعز واجلال واكبار
وخص الأمير سعود نمر النماره = سعود بن نايف ذرى كل محتار
حرٍ على العليا بمشيه جساره = عقب الشيوخ أهل الوفاء واهل الكار
بالصف الأول مجلسه بالصداره = بين الشيوخ اللي لهم صيت واذكار
مفراص عسرات الصعاب بجداره = فتال نقاضٍ صعيبات وعسار
وانا مجيي يا ابو فارس زياره = مالي لزوم بجيتي غير زوّار
قدر ووفا طاعة بكل اعتباره = يعني قدر عز ومحبة ومسيار
قصيدة في الشيخ سعود بن نايف بن هديب 
العرض الشجري
