هذه القصيدة يسندها الشاعر : سعد بن عبدالله الفريدي على الشاعر والإعلامي : رشيد بن محمد الفريدي
يارب تفرج لي من الهم والضيق = والمنزل اللي ما يحبه نزيله
سرداب هم وغم وأشباح تويق = راحت به عقول العوارف هبيله
ما فيه ما يشرح صدور المخاليق = الا مع الهجعة صلاة النفيله
وخلوه مع الخالق وصحوة وتدقيق = ومحاسبة نفس بأملها طويله
أذوق من طعم السعادة تراميق = اليا دعيت اطلب من الله فضيله
لو كان همي كبر أبانات وطويق = وعجزت عضودي لا تشيل الثقيله
شلفا الزمان اللي تفك المعاليق = جرت عليّ من السوالف سحيله
وقامت تصب من البلاوي مصاليق = والحال من صكات بقعا نحيله
وتمزقت مصادر الخير تمزيق = وتاهت مناهيج الحياة البديله
والمشكلة صارت بوجهي مغاليق = كل الدروب اللي سلكها الدليله
والحلم مات وكفنوه المطافيق = وحطيت له فوق النصايب نثيله
ولا صار للنكبات طرق ومزاليق = ما فيه أمان من الظروف المهيله
والهم طال وحرّق القلب تحريق = والصبر راح ولا بقى لي وسيله
الا النوادر مع سمان الطواريق = تجلي عن المشحون جمرة غليله
وأسندتها لرشيد شيخ المطاليق = شاعر وتجمعنا حقوق وقبيله
ومن لايعه سم الهبايب على الريق = عد الروى يروي ظماه وصميله
وصدور عكفان الشوارب صناديق = يموت فيها السر ما أخلف مقيله
ومن صدّر السلعة على غير تسويق = كنه على خيبر يطوف بزبيله
وجاك الكلام اللي بحكمه وتنسيق = الطرق واضح والعباره جميله
وسلمتها شاعر وناقد وذويق = وغلفت معناها وقلبه دليله