**((عذبتني بالصوت ياللي تجره))**

عذبتنـي بالصـوت ياللـي تجـرّه=وش حاجتك بمولع القلـب تشقيـه
كان الزمان الشين مسقيـك مـرّه=انا شربت المر لـو كنـت كاميـه
يامـا تلقينـا علـى حيـن غـرّه=طعنت حبيبٍ ماضي الحب ناسيه
منهـا نـقـول الـوقـت لله درّه=يكشف لنا اللي بعض الاحباب يخفيه
ما شاف من ذاق الهوا ما يسـرّه=حتى لذيـذ النـوم مايهتنـي فيـه
تلقى لـه بـدرب الغرابيـل جـرّه=واللي يسلي خالـي البـال يبكيـه
اللي بوصله شفت منْـه المضّـره=بعد المفارق يجرح القلـب طاريـه
يخطي ومن حبـه عليـه اتشـرّه=اشره عليه و لا تفيـد المشاريـه
و ارضى بما يرضيه خيره وشـرّه=اثر الغـلا لا زاد بالقلـب يعميـه
لو انه ابعد مـن نجـوم المجـرّه=بعض الغلا مايقدر الوقـت يمحيـه
ليت الغلا الـي مـر قلبـي يمـرّه=ويذكّره حبٍ من العـام ناسيـه
او ليت في صبرٍ صبرته مبـرّه=يمكن يطيـب القلـب ممـا يعّنيـه
الجـرح مابيـن المحانـي مقـرّه=ليت السبب في جرح قلبي يداويـه
والشوق لو تخفيـه مـرّه ومـرّه=تبيـن بعيـون المولّـع مواريـه
والصبـر لـو تاليـه مثقـال ذرّه=اليوم من جور الزمـن راح تاليـه

رااااااااااااااقت لي
ارجو ان تعجبكم