صاحبي ناشني بالموده نوش هذه قصيده للشاعر سعود بن ثويران المطيري

هذه قصيده للشاعر سعود بن ثويران المطيري

صاحبي ناشني بالموده نوش=نوش ناب الحنش للقدم لاناش
تلني تلة الواحد المدغوش=ناقص العقل ينقال فيه دغاش
وتلني تل دلون على الرهوش=لازمت السانيه والمقام هشاش
سج لقياها يوم جاه البوش=راعي السانيه من نياقه شاش
آه يلي بملح الحلى مرشوش=هشت فرقاه لاشك ماتنهاش
صاحبي منزله بالحشى مفروش=حطله بالحشى دوشق وفراش
وسط خاف الضماير بناله حوش=مثل بني الحكومه بحد الطاش
له صرار بقلبي ماهو بمنقوش=داخل القلب عسر على الفتاش

نعم أخي ذعذاع الشمال
وقدجاراه محمد بن خلف الخس بهذه الابيات

صاحبي ناشنـي بالمـوده نـوش=نوش مسقًا تساعر بوسط الجـاش
تلنـي تلـت الركـب للقنطـوش=يـوم قفوبهـن شافهـم حشـاش
عوص هجنن عليهن مصطر غوش=وجههم كاسبًـا والقفـا منحـاش
لاعني بالهوى لوع فرخ وحـوش=واودع الكبد مـن سبتـه حمّـاش
زين فوق المبيسم ثـلاث رقـوش=فوق خدًا يشادي شقـاح الشـاش
ان نطحه الهوى ضامره منجـوش=وان قفاه الهوى شايفـه ماعـاش
وان ضحك بالرهايف يابو علوش=مت واعمري اللي خـذاه بـلاش
يوم احلي جديله شليـل كـروش=شافت السبر يومي على الادبـاش
ذيل شقرًا تكـزه بوجـه الهـوش=كـل ماامهلهـا بالرسـن تهتـاش
آه يامشخص الصايـغ المنقـوش=فاصلاً في حماره بيـاض قمـاش
مشخصًا صافيًا ماعليـه عبـوش=كامل الوصف مافيه قولت مـاش

وأيضاً جاراهما عساف بن دبيان أبو أثنين على نفس الوزن والقافيه

ولكنني لا احفضها أشكرك أخوى على الايراد الجميل

وهكذا يكون النقل مفردات ومعاني جزله

لك شكري وتحيتي

هلا فيكـ ابو فيصل تتعطر المشاركات بردودك المميزه والإضافه الجزله