لآضاق صدرك عالي الصوت جره**لو كان قلبك مايطاوعك مسرور.

لآضاق صدرك عالي الصوت جره=لو كان قلبك ما يطاوعك مسرور
دنيـــــاك لو تسوى من الحِزن ذرّه=ما كان تاليها توابيت وقبــور
وما كــــــــــان للكافر بعمره مسره=وما شفت في ملكه ملايين وقصور
العمر يمضي بين حــــــــــلوه ومره=والموت حق وقابض الروح مأمور
دام الحيــــــــــــــــاه الفانية مستقره=ورزقك يجيك وبين الأجواد مستور
لاتنشغل بالــــــــــوقت برده وحره=واحذر تصير بقسمة الناس مقهور
وحكم القدر لاجـــاك خيره وشره=أشكر عظيم الشان والذنب مغفور
والمجلس اللي يزعجك لا تمره=خله تراك بشوفته منت مجبور
والرجل سقها في صحاصيح بره=ومد النظر مابين ريضان وزهور
لا صار وجه القاع ما فيه جره=والمشي حافي والثرى تو ممطور
ساعات صمتٍ ما وراها مضره=تسوى الكلام اللي به إذنوب وإشرور
أطلق خيالك وأترك النفس حره=وخل الطبيعه في حياتك لها دور
وبالليل لا بانت نجوم المجّره=أذكر بديع الخلق بـِ إحـساس وشعور
واسجد لرب الكُون مره ومره=وإحفظ لسانك وأترك الكذب والزور
وفروض ربك خلها مستمره=وطاعتك لا يدخل بها نقص وقصور

غزاي الحربي