قلب وأماني

قــــلــب وأمــــانــي



هذا القلم/آلة حزن تعزف حروف
وهذا الحبر/خمر الورق والمعاني


حبيبتي وان شفتي أقلامي وقوف
لا تحسبين إن أعذب الشعر جاني


حتى الشعر تعترضه أحيانا ظروف
ويمر في قلبي وينسى لساني


جيت أوصفك ماتت تحت رجلك وصوف
جيت أنطــقك راح الكلام وعصاني


حبيبتي والليل/شماعة طيوف
عليه علّــقت الأمل والأماني


أتذكرك والبرد ووشاحك الصوف
كم كنت محتاجك وكم كنت أعاني


وأتذكرك والحيرة تحايل الخوف
كم كنت خايف لا يقصّر حناني


كنتي/وأنا/والعشق/والجو محفوف
ما زاد عنا غير صمــت المبــاني


كان السهر طربان والليل مكسوف
وكان الحكي من شفتينك أغاني


في الليلة اللي بدرها صابه اخسوف
كنتي هديه للسما والمواني


طرتي مكانه/وأقبل الغيم ملهوف
يبي يضمك بس نــورك أنانـــي


وأنا مثل هالغيم من حولك آطوف
بغيت أضمك بس عيــــا زماني


نضحك حزن/ونشوف/ونصد/ونشوف
ونضيق/والضيقه سجينة محاني


ما فيه داعي نسمع أعذار وحلوف
ما دام ما نقدر نعيد الثـــــواني


أنتي رحلتي دون تلويحة كفوف
وأنا رحلت بدون قلب/وأماني !

أنتي رحلتي دون تلويحة كفوف
وأنا رحلت بدون قلب/وأماني !




ما ابلغ الوصف


صح لسان الشاعر وسلم قلمك ميس الريم النازف بالجميل الجزل



تحيه تقدير وثناء

يعطيك العافيه على الاضافه الرائعه اختي ميس
تقبلي وافر التقدير

هلا فيك أخينا غازي بن عجاب
مرورك منور على الأبيات شعاعا
وزاد القصيدة رفعة وتألقــــــــــــا
ولك منا شكرا وتقديرا

أخي النمر الأرقط
مرورك عطر الأبيات
وأضاف عليها مـــــــــكانة وجمالا
ولك منا شكرا وتقديرا