عزي لبعض البشر من ضعف منطوقه = لشاعر محمد الهديب

17-08-10, 02:18 AM

الشاعر محمد بن عبد الله العواد الهديب الفريدي
قصيدة نقد

عزي لبعض البشر من ضعف منطوقه =وده يجيب السوالف مار يخطيها
يبي يسولف ومنطوقه ظهرعوقه =علوم غيره يحب انه يسويها
في عزلتن عن جزيل الهرج وطروقه=عنده تضيع السوالف عن معانيها
اليا سكت قيل هذا من حسن ذوقه =وسكات بعض الاوادم ستر خافيها
لو يفهم الضايعة مافك صندوقه =لاشك عنده دروب العرف حاويها
لو هو على زبرته مابانت افتوقه= بقى على هيكله والناس يوحيها
مار القراده هي اللي تطلق سبوقه= اليا نطق كلمتن يبلش مداويها
اليا سمعها قريبه طاح دانوقه= والا بعيد العرب تضحك حصانيها
يفرح بها واحد ماتابس شدوقه =الضايعه من ردات الحظ يشريها
هي راس ماله عليها يعتمد سوقه= يصغي لها قبل غيره عند طاريها
نفسه على جمعة الهزلات مسيوقه= دافع رداء النفس والشيطان مغويها
في حوزته عوج ربعه خابت اوفوقه= وإلآ جميلاتهم مايعتني فيها
يالله يارازقن عبده ومخلوقه= يعالم بالنفوس وسر خافيها
يامحيي اللي هشيم بادت عروقه= ياباسط الأرض ويامرسي رواسيها
تفك خلقك من اللي صار به توقه = يردها في عروض الناس واطيها
مركز رداء للرداء من نبتة عروقه= نفسه رداها عن الجزلات يعميها
عسى خبيث السجايا عثرته فوقه =من شان يفرغ على حاله يربيها
بالعافية يستغل اللاش سمحوقه= يجمع قبيح البضايع من مجانيها
لو هي ضعيفة تجي جزلة لها لوقه= مكملن نقصها كنك مسويها
واليا قعد عاجزن ثم طش معلوقه= رب المخاليق من شره يعافيها
مايحسب ان السفينة فيه ملحوقه= مار المقادير تجري بامر واليها
عساه فدوة لربعن عندهم روقه =اللي دواوينهم يرتاح ناصيها
ماهم على هرجة الهراج مطفوقه= وهروجهم مايجيها مع مثانيها
والكلمة اللي تحسك عنك مفهوقه= من شان لاتجرحك كلن يخليها
هرجة رجالن لها بالمجتمع ذوقه= يرتاح بالك من الهرجة وراعيها
اخير من هرجتن تمحق وممحوقه =هرجة غفلص رجالن مثل اناثيها
سوالفن للنشاما غير معشوقه =ابوحقب لاسمعها راح يتليها

يرتاح معها وفيها زايد شوقه =وعن غيرها لو تتوق النفس معفيها
يعيش في ظل غيره لين زملوقه= قام يتمايل اليا هبت ذواريها
ولابد ماينتهي مشوار دغروقه=يذوق مر الليالي عقب حاليها
وصلو على المصطفى مالاحت بروقه =شفيع الأمة وللاسلام داعيها