الشايب والوايت

الشايب والوايت

يسولفون عن شايب نوى يشتري له وايت علشان يسقي الحلال ، وذالشايب متقاعد وشاريله رعية غنم
وفوقها خمسين ناقه ، فأخذ يجمع له دراهم لين صار عنده حول خمسه وثمانين ألف ريال ،
فقام وتوكل على الله وعَزْم يروح يدور له على وايت .
صدفه وهو يمشي إلا ذيك الناس مجتمعةٍ في أرض فضاء كبيرهوحولهم وايت واقف ، أعجبتالشايب نظرة هالوايت وهو ما شاء الله يبرق من بعيد ووقفته شيء عجيب ، قال بس لقيته خلني أروح
أشوف كم هو واصلٍ سومه وإذا هم حادينه أشوف كم هو عليه .
وصل عندهم الشايب ووقف يسمعهم يحرجون ، وأستانس بالحيل لأنه ما هو بغالي ، ولا ذاك الرجال
ماسك المكرفون ويحرج 50 ،، 52 ،، 55 ،، ومن قال زود ، قال الشايب بس شكلهم يحرجون على
هالوايت ولا هوب بغالي وإن شاء الله يكون من نصيبي .
ويخش معهم بالحراج ... 56 ... ويزودون ... ويزود ... ويزودون ... ويزود
المهم وصلوه 75 ... قامالشايب وخربها وقالهم 80 ...
هو قالهم ثمانين ... يوم طخوا كلهم وسكتوا .. ! ..وهجدوا .. !! .. والتفتوا عليه .. !!!
يناظرونه .. ويناظرون بعضهم .. تغامزوا ونقز له واحد منهم .. ويسحبه على جنب وقاله شف يا رجال أنت باين عليك أبن حلال وطيب بالحيل ، وش رأيك لو نعطيك شيك بمليون ريال ذالحين
بس أمش من هنا ولا نشوف وجهك واقف معنا بالحراج .
أنصدم الشايب .. وأفتر راسه شوي وقال هااااا .. وش السالفه .. ؟؟!!
مليون ريال .. وليه..؟؟
قال له الرجال بس خذ هالشيك وتوكل على الله والله يستر عليك
وش أسمك ..؟؟ عطاه أسمه وكتب له الشيك بمليون ريال وصرّف الرجال من
الحراج وهو ما يدري وش السالفه .. !!
طيب وش العلم علمني .. ؟؟
علمه بالعلم أثر ذالجماعه يحرجون على المخطط وواقفين بالصدفه بجمب الوايت اللي جايبينه يرشون به
الأرض علشان يحرجون ، والحراج من اليوم بـ 56 مليون و75 مليون .. وأبو الشباب (الشايب) خش
عليهم عرض ولا يدري وش العلم .
وهم بعد أخترشوا شوي يحسبونه هامور وبيلطش عليهم المخطط .. قاموا صرفوه بمليون ريال ..

وهو ما صدق طاير من الفرحة مليون ، ويقول بخاطره

(عجزت وأنا أجمع خمسه وثمانين ويجيني ذا الرزق من الله بهالسرعه)
فسبحان الله مقسم الأرزاق على عباده .
الرزق مثل الأجل يتبعك

الله يرزقنا بمخططن بالغلط

ماحولكم وايت للبيع ههههههه ..