حطم به عليـان الارقـام تحطيـم

احبتي
أسعد الله جميع اوقاتكم بالخير والمسرات هذا المساء وكل مساء
اهديكم هذه القصيدة التي شارك فيها الشاعر : لافي الغيداني
بها في حفل عليان الطهيمي الذي اقامه ابتهاجاً بحضور بعض
امراء قبيلته واعيانها يوم الاربعاء الموافق 1/11/1424هـ
وعلى راسهم / الامير نايف الفرم والشيخ حجاب بن نحيت .

ياعلي مايحتاج دعوه .. وتلزيم = صارت علي مشاركتكم فريضه
لاتعتبرني ضيف يابن الاكاريم= شف وش نقيض الضيف وانا نقيضه
راعي محل .. اطآول براسي الغيم = في وسط بيت ٍ جمر ناره وميضه
وميض براق ٍ رعوده مرازيم= ليله معتم .. وامهاته غليضه
يجذا على جاله دلال ٍ مذاليم= فنجالها يشفي الكبود المريضه
للضيف يركض به عيال ٍ شغاميم= من ركضهم سرحان ياخذ ركيضه
اول مواجيب الرجال المحاشيم= في بيت شيخ ٍ فيه للطيب هيضه
بيت ٍ على كبره ملوه المعازيم= يكتض في جمع ٍ ينومس كضيضه
ماضاقوا اصحابه برحال .. ومقيم= ريف المسير في شتاه ومقيضه
ذكر علي ثليم ياعارف اثليم = اللي ضيوفه كثرهم مايغيضه
مفروش بزلول ٍ حديثة تصاميم = كن الزلول نقوشها نبت فيضه
اللي على كسب المراجل مضاريم = ماقدموا .. مافكروا بتعويضه
حطم به عليان الارقام تحطيم= ماشال هم التكلفات البهيضه
لعيون وضح ٍ كفو عشق المغانيم = علط الرقاب .. ام الخدود العـريضه
لياخطـّمت على اهل العرف تخطيم = تخاسر ارماشه .. ماهي بتغـميضه
يسج معها صاحب الصنف ويهيم = وريض لو ماهو على حد ريضه
تكسب رهان مقيم الزين تقييم= اخيار اساميها تسمى مغيضه
وجيهها لاناحرت لك مطاخيم = امدور العذروب تيبس لحيضه
رثم الخشوم .. مهدلات الخراطيم= تقول نايشها لها شوي غيضه
وظهورهن متفهقات ٍ مراديم= بان ٍ عليها الحال ماهي غضيضه
سنام وحدتهن عليها منه ضيم = كنه على الوضحا السناد النهيضه
مرسام دولـه .. لاتضاح المعاليم= حولـه نزاع الهرج مافيه عيضه
من كثر مالله فاهقه .. تقل ترهيم = متنكس ٍ صوب حجبتها مفيضه
تيّم بها عليان الاسعار تتييم= ورخصة على بياعها رخص بيضه
نقوة مغاتير ٍ علي الملازيم = اثمانها ماهي عليها غميضه
تغار من شوف وبر تها المجاهيم = وتنظر لها نظرة بغيض لبغيضه
طياحها مثل مخيم روضة خريم= اللي بطلعات ابو متعب حضيضه
يالله ياللي في يديك المقاسيم = علام سود اعمال عبدك وبيضه
عسى السحاب لياغداله ترانيم = يهل وبله .. ويتعاقب نفيضه
على وطن شقر الحرار الصواريم = حكام نجد اللي ولاهم فريضه