أرسل هذه الأبيات لشاعر حامد بن عبيدالله بن ردمان الفريدي وكان والمقصود
أخوه محمد بن عبيدالله بن ردمـــــان
لابديت القاف بالشد والضمه = إنخزى اللي يدعون الشياطيني
راكب اللي يطوي البعد ماهمه = مايهمه بالمسافة نهاريني
وارد الألمان يكفيك بالقمـه = والقطع ماقيل تجميع بالصيني
إن هوى يشبه لك الفهر بالجمه = وإن زمى يلحق أفروخ الشياهيني
تفرد الجنحان بالجو وتضمه = ماتقارن به مثل رمشه العيني
من تمسك مقوده ينجلي همه = كنه اللي رابحن له ملاييني
نصه اللي يفهم العلم مايخمه = حامد الردمان مافيه تخميني
وإنشده عن الرعن صاحب الهمه = أبو مشعل ريف من جوه عانيني
ليش أبو مشعل على عفشه يلمه = معذرن بالملك والربع الأدنيني
كان قصده دين لرهن له الذمه = مطلب محمد على الرأس والعيني
والرجل لاإنظام ينصا بني عمه = قالها من جرب العسر والليني
والله اللي يجمع الشمل ويلمه = جل شان خلقه العبد من طيني
الشاعر/ عبدالله بن سمير العوماء
رد الشاعر / حــــامـــد بن عبيدالله بن ردمـــــــــــان
من ضميرن ينحت القاف من صمه = دام به دافع على القاف يعطيني
مرحبآ بالخط واللي بعد تمه = خط أبو فايز ابيوته مثاميني
أرسل المندوب بالخط من يمه = من على اللي سكبته تعجب العيني
وارد الألمان مافيه ماذمه = واردن من مصنع له إبرليني
لاعطاه السائق اللي عقد كمه = مقدمه عن مخيره زاد شبرين
سامعن علمن مع الناس ويهمه = وعنه خذ تفسير فيه المظاميني
أبو مشعل باع بيعن على يمه = والله يعوض الأجاويد ويعيني
باع ملك الملك والله فرج همه = أزمه وعدت وأبشرك في حيني
سدد وقارب عسى المبتغى إتمه = من يظن بخير في قلبه إيقيني
ماتركها إعياف له همه إمهمه = ولابه إقصور بكل ربعن أمواليني
وكل رجلن طبعه إيشاف في دمه = يكفي العارف نظر فيه ويبني
والجمل حملة لو يزود يزتمه = وكل مازادن إحموله له براهيني
وكل حملن يظهر الحيل في كمه = والرجال أشكال بأصل أو معاديني
والهواء ماهو على الكيف واليمه = والليالي للبنادم مكاميني
قصيده موجهه لشاعــر: عبدالله بن سمير العوماء 
العرض الشجري
