قصيدة ابن سدحان بااللكزس

هذه قصيده للعضو ابن سدحان الشاعر عبدالعزيزبن راشدالفريدي بمناسبة اجتماع السداحين من الفضول في عيدالفطر الماضي واترككم مع القصيده

ياالظيق ماهي على ماقالو طواله=عطني مجال أخذ انفاسي واخليها
حاله مهي بي حاله حالتي حاله=ماكل طاروق لا جبته يكفيها
اندب لها هاجس تسعفني جزاله=حتى يعبر عن النفس وخوافيها
لاقمت اغني بطاروقه ومواله=اما يزيد الشقاء والايسليها
الله على اللي شراها يعتبر طاله=ماكل رجال يا رجال يشريها
ياكثرهم حولها حوافة الصاله=وياقل دفاع قيمتها وقانيها
سيارة شغلها كله على الاله=زر تشغل به وزر يطفيها
ماهو على خشمها تمثال الانباله=لاجيت اوصف علامتها واحليها
كنك تناظر بعينك في يد بياله=بدريق والقهوجي قدمك موطيها
والا كما يد هنوف بس في حاله=لحظة على خصرها حطت حدى يديها
لكزس وعبداللطيف موصي عياله=تحشم مثل ما يحشم النوق راعيها
اللون لون برده والمزن هماله=او لون وضحا مربعة مراعيها
مع فتحة السقف غترة كنق وعقاله=توه مظبط مرازمها وكاويها
والدرب لا من بغيته ترسم اطواله=وتظغط على الذاكره حتى تهييها
وتبدى تبرمج لك امتاره مع امياله=وترجع تحدد مسافاته وتمشيها
واللي تطوفه ليا طفته يوراله=انه تعداه حاجه ماجزم فيها
ينظر خلاف ويمين وينظر شماله=ويرجع يناظر بها قدمه ويخطيها
وصفتها مار لا سالي ولا داله=النفس ما تدله الا بين اهاليها
لا جيت حفلة ذوي سدحان وعياله=في ديرة باالولد والمال نفديها
سجيت والظيق راح ومالي وماله=واجهت لي ناس استانس بطاريها
ونفسي تغلب على همي وتغتاله=قرب الجماعه وشوفتهم تسليها
ربعي ليا جا اللزوم وكبرت القاله=من فضل ربي علينا ما نحاتيها
سلالة من سلاله تتبع سلاله=على معزه من اولها لتاليها
من روس قوم تذلل كل عيّاله=لا وصلت راشد الاول عزاويها
لبوي في ذكرهم بيت من اقواله=من ظمن مقطوعة جزله معانيها
يقول بين الجماعه تكبر أماله=حتى الجيوش العظيمه مايباليها
ماعاد يشقى بقوة بوش وامثاله=والصين وانقلترا واللي يواليها
قاله وانا ارجع وقوله مثل ماقاله=احاول امشي على اقواله واسويها
اشيل فكره مهو بس اسمه اشتاله=شيبانا ننقل ارياها واساميها
يقولها شاعر ما جا على باله=الا بيوت تجمل يوم يلقيها
وصلو على المصطفى واصحابه واله=شفيع زلات الامه عند باريها

الله الله الله
صح لسان ابو راشد وسلم بنانه ووجدانه ...
عبد العزيز علم في الشعر وفنه وهنا الدليل على تمكنه وطول نفسه ما شاء الله ...
وحقيقة نفتقده منذ فترة طويله عسى المانع خير .....
ويستاهلون ربعنا السداحين وكل فريدي اجمل المدح والثناء ....
ولك الشكر اخي عبد الله على هذه الاضافة الجميله لمجالس ربعك ...
لاهنت
................

صح لسان الشاعر ابو راشد وماقصر

قصيدة رائعة وشاعر متمكن

واشكرك اخوي عبدالله لهذه الاضافة

ولك تحياتي

صح لسان الشاعر ابو راشد قصيدة جزلة ومعانيه رزينة ومن النوع الفخم

وكذا عرفنا عنه ونتمنى له استمرار العطى وانتقاء المعاني الرائعة كروعته

شكرا على اضافة المقطوعة الرائعة

صح لسان الشاعر ابو راشد وماقصر قصيدة رائعة وشاعر متمكن

يعطيك العافية
أخي عبدالله بن راشد على نقلك الجميل
وصح لسان شاعرنا أبو عاصم على هالقصيدة الرائعة

ما هي غريبة على عبدالعزيز الجزالة

والله يرزقه باللكززس

وتحياتي وأشواقي لشخصه النبيل وقلمه العذب التلقائي

وتحية لك أخي عبدالله وشكري وأمتناني

صح السانك واعتلاشانك قصيده جزله وتوصيف


بليغ وشاعر متمكن وتسلم اباراشد

وياهلا ومرحبا

صح لسان الشاعر عبد العزيز بن سدحان

ويعطيك العافية أبو راشد على هذا النقل

.

قصيدة فخمة كفخامة اللكزس
وطيبه كطيب من قيلت بهم

صح لسان ابو راشد
فاقدينه عسى المانع خير
بلغه سلامي ياعبد الله

وسلمت ودمت على النقل الجزل

تحيتي وتقديري

.