مجالس الفرده

مجالس الفرده (http://www.alfredah.net/forum/)
-   مجلس الضيافة (http://www.alfredah.net/forum/alfredah9/)
-   -   ابوضوايه وصل (http://www.alfredah.net/forum/threads/alfredah1991/)

ابوضوايه 05-06-07 07:25 AM

ابوضوايه وصل
 


بسم الله الرحمن الرحيم



~*¤ô§ô¤*~*¤ô§ô¤*~ابو ضوايه~*¤ô§ô¤*~*¤ô§ô¤*~


السلام عليكم ورحمة الله وبركاته

أعرفكم بنفسي يا لفرده
أنا وانا عني بنيخي بناخيكم ( ابو ضوايه )فريدي وابن حمولة طيبه منكم وفيكم ولا بي زود عنكم ولا ذودي اكثر من ذودكم

المهم ابي اسولف عليكم قصتي مع مجالس الفردة واشلون دريت عنها ؟

كنت راجع من شغيل لي باطراف الديره ويوم وصلت البيت ولانا حراوي العشاء دخلت وسلمت على العيال وعجوزهم وتوضيت ونحرت لم المسجد اباصلي العشا ...

صليت مع الربع وسلمت عليهم .. وتيسرت لبيتي ادور ارزاق الله ثم عشا ام العيال ..

يوم دخلت البيت...

الا وم ضواية تحراني ومزهبةً القهوة والقدوع ..

وهاك الطشت جنبها مراتسيته على هاك الجريكل !!!؟

ولا العجيز مسفهله وياهلا ويامرحبا ويالله حيو ابن عمي ( تسنها سورية بسم الله عليها ) ..
شوي وتقول تأبرني !!

المهم وخذ عندك من لاتعبت ولا ندمت واسفرت وانورت (قايلكم طاقها الليله عرق شامي شوي وتقولي يا ابو انور).. بسم الله علي انا ولا علي اززدا..

المراد وتصب لي هاك الفنجال وتناولنياه وهي ترحب وتهلي..

( مدري وش سالفتها الليله ) ترحيبها تسثير ... اكيد وراها بلى خبري بها ماتهرول عبث... (شويطينه)

وتستدني طشتها !!!؟
وتسحب الجركل!!!؟
وتصب منه بالطشت...

وتصوت للبنت :- ياضوايه هاتي (ساسا) ساسا؟؟؟

منهو ساسا لاتكون والدةً عقب العجوز !!؟

وتبي تروش الورع عندي؟؟
لالا المره قاعدةً لها سنين ضليمتها شينه.
أجل وش السالفة ومنهو ساسا سأسأت عين العدو..

لا لا يمكن يمكن.. تبي تغسل خلاقينها!!!
( تسنها مشتهية تغسل عندي ) انا ابو ضوايه ابوها ... مابقي الا هذي!!!؟
المراد...
وتسحب الطشت عند رجلي...
وترفعها وتحطها بطشت اللي لاصقتن به ريحت (التايد )و (الجوفيل) <<< كلوركس اول ماطلع

الا والبنيه معها هاك العليبه الصغيره اثره ملح ..
ليت ماتبي تسوي بي بلا ولا ناوية تثور به ..
ماتجي يالربع ملح وطشت ...
العلم ..

وتكب منه وتفرك رجيلاتي وهاتك يالسوالف الزينه والعلوم الخاثره ..

وانا قعدت افتسر ومسوي نفسي منشغل عنها
( ياذاك ان الوضع عادي... مادام ان الجو هادي... يمكن اتعبها بعادي .... ولا انا مابي جديد.!!!؟
قمت افتسر واتصبر .... وبالعجوز انا اتفكر .... ياترى شالي تغير .... ولا انا مابي جديد...!!!؟
وصارة الرفلا تحلس ... وبزبدة ارخال تملس.... ولا انا بوكي مفلس ... يعني مافيني جديد!!!؟)

المراد يالربع..

قرصني قلبي منها وتسني فهمت السالفة ...
وانا الكزها برجلي على ركبتها ولا ها منقلبةً على عصيعصها ...

قلت :- قومي يامل القامه تقمتس اغرفي عشاتس ...
سرى الليل ..وانتي مشتدتن برجلي
وانا جاين من طرقه وتعبان ودي ارقد بدري <<<<< بدينا بذهانه

قامت الماخوذه تجرجر وهي تونون وتقرمض مدري وش تقول .

تعشيت واللي علي بالخير .. واستدنيت الرادو ابي اتوحى للاخبار على لندن ..

يوم شغلته ولا تقل احد الورعان لاعبً الموجه فارها عن لندن وانا يالله اظهرها لياضيعتها...

كان ماهو يدور على اهل الكورة؟؟؟ مدري حظي بري ماني راعي تهمه.

تقل بغيت ازعل وقوم عليهم هم ومهم ... إلا وانا اسمع صوت هاك الرجال
تسني اعرفه الا هو الا ماهو هو ،هه الا الا تسنه صوت رحمة غنام ابن متلع !!!
وشلون ؟؟؟
المراد ارخيت اذني وقعت اتسمع لرجال





















الا وهو يقول ((هنا مجالس الفرده))

معكم عبدالله ابن غنام الفريدي من مجالس الفرده
وبمعيته كل من
السيد/حويان ابن مرزوق الراشدي
والاستاذ /زيد ابن متعب ابن حماد (دخلنا بالومراء)
والنقيب / منصور الوسوس (دخلنا بالضباط) يالله علم خير
والمصرفي / منصور الطهيمي (طبحنا باهل البل )
واخيرا وليس اخراً الوالد // احمد العود (راعي الطيب / القلب الطيب)

ابكم العلم وشو ..؟؟
ابكم الربع علامهم ..؟؟
وش قصة الفرده الليلة ..؟؟

وانا اتوحى لهم وتوحى لهم وتوحى لهم لين اخلصم
ولا العلوم اللي توسع الصدر ..
واللي ماهي غريبةً عليهم ولا على اهلهم وربعهم ..
ولا الحيا والذكر الطيب والمجلس اللي يطرب والعلوم اللي ترفع الراس ..

ولاهم يحتسون بكلام لشيخ من شيوخ الفرده

زيد ابن حماد

ماغيره

ويثنون على كلامه وتوجيهه لشباب ربعه
وحث لهم على الفضيله وطلب العلم ومواكبة العصر ...
والصدق بالقول والاخلاص بالعمل وحسن الخلق والنيه.. ويدعيلهم بالصلاح .

ولا يوم الخاطر ساح ، وانفل الحجااااااااااااج ...
وانا اصوت على الورعان
وهم يجون يتراكضون لمي..


قلت من فر موجة الرادو ؟

وكل يقو ماهو انا يبه ماهو انا
اللي يتعذر بالنوم واللي يقول سارح ولي يقول مصخن وعليه حمى ..
قلت هيه هيه اللي فرها يعلمني
ترى اباعطيه ريال
يوم قلت اريال ولا كل واحد رافع اصبعه يقول انا(تسني المدرس حقهم)

(بسم الله علينا حب الدنيا حتى بالورعان)

واطلع البوك واعطي كل واحد ريالين
والفز العجوز بخمس وثلاثين ريال
الخمسه عن اللكزه والباقي رضاوه..

وهي تقرب يم رجلي وتحطها بالطشت مرةً ثانيه ( تبي لكزةً ثانيه) ادور الدراهم
بس على مين تلعبها على مين( ياغندور).. <<<<<اسم الدلع لاصار الخاطر وسيع .

والتفت للورعان وهي تفرتس رجلي الله يعز مقامكم يالنشامى ..

قلت اسمعوا نزلوا الحطب اللي على ( الهاف) فوق الشد.
وشدو عليه الطربال زين ..
ولمو العزبه قبل ترقدون ..
ولاتنسون (ضوايتي) حطوها بالدرج..

ابا اجهم عقب صلاة الفجر ..

قالت ام ضوايه : على وين النيه ان شاء الله ؟
حجاج؟
( والله من الدجه حج بالقيض)

قلت لا ابجهم للعتامى بمجالس الفرده

ابسلم على الربع واخذ علومهم وابارك لهم بالمجالس الجديده ..
واتمرح عندهم لي ليلتين واتقضى من السوق واجي انشالله...

يوم صليت الفجر وانا اشغل الفرت (الهاف)... وخليه صلنصيل
حروت نص ساعه واتفقده ..

وانا اركب قبل طلعت الشمس ..
واقوم اناتله بالنمر
وهيجن
ياركب اللي محاحيله خنازير=== مطعومه القيز قيز القيزخانه
ايبله ايبله
لين وردت على العرب

وهالحين وصلتكم يالربع

وماعندي الا سلامتكم

السلام عليكم
وصبحتم بالخير يالفرده
ومنزال (ن) مبارك ان شالله ...

اما الضوايه //

لها سالفه غير مثل جده غير

اقصها عليكم عقبين بشاية الكريم



ابوضوايه

مشعل الجضعان 05-06-07 08:43 AM

رد: ابوضوايه وصل
 
الحمدالله على السلامه



والله يحييك


بين عيال عمك



مليــــــــــــــــــــــ ـــــــــــــــــــــــــ ـــــــــــــــــــــــــ ـــــــــــــــــــون

هلا

زيد بن متعب 05-06-07 09:47 AM

رد: ابوضوايه وصل
 
http://islamroses.com/zeenah_images/wel172.gif

ياهلا وغلا بابن العم

وحياك الله

ومبدع والله ..

وحضور ك غير مثل سالفة الضواية .

اسلوب جداً رائع ومتفرد ...

الفريدي 05-06-07 10:04 AM

رد: ابوضوايه وصل
 
هههههههههههههههه نسيت نفسي كأني اعيش احداث قصتك المشكلة اني صدقت

ياهلا وبدايت موفقة والله يحييك في مجلس من مجالس ربعك اعجبتني يوم مشيت قبل الفجر لأن المجلس في القمم ويحتاج مجهااااااااام

ياهلا وغلا بك يا ابن العم الغالي هلا تراحيب المطر

أبو ياسر الفريدي 05-06-07 11:26 AM

رد: ابوضوايه وصل
 
حيااااااااااااك الله بين ربعك وعيااااال عمووومك .....

ننتظر منك الأستفادة و الأفادة ..


تقبل تحياااتي .

فهد تركي الفريدي 05-06-07 12:10 PM

رد: ابوضوايه وصل
 
ههههههههههههههههههههههههه هههههههههه


خوش توصيف إداره


حياك الله في مجالس الفرده



متعب بن نومان 05-06-07 01:15 PM

رد: ابوضوايه وصل
 
يالله حيه في محله

ومررررررررررررررررررحبا مليووووووووووووووووووون

أسعدنا تواجدك بين ابناء عمك وهلالالالالا وغلالالالالا


وبيض الله وجهك من دعاك وبيض الله وجهك على تلبية الدعوه





الا تسنه وتسنها ماتركب ولاتجي ابد هههههه

(او اكيد مكثر من الكليجا هههههههههه)

يالله حيه وهلالالالالا فيك يابن العم

فهد تركي الفريدي 05-06-07 01:19 PM

رد: ابوضوايه وصل
 






ذيبان 05-06-07 02:12 PM

رد: ابوضوايه وصل
 
وش ها ال ابو ضوايه هذا اللي وصلنا مع العلم الغانم والحموه الزايده والاخلاق الحلوه والبدايه الرائعه التي شدتني للقراءه للاخر 000

عيال ابوي الفرده 0000 عز الله اللي هذا اوله 0000 ندور ونبي تاليه 000 يا طيبك طيباه يا الفريدي


اسفرت وانورت وربي يحييك بمجالس الطيب والعنبر والزعفران والله يحييك بوسط عيال ابوي وابوك راشد الفريد

منصور الطهيمي 05-06-07 02:30 PM

رد: ابوضوايه وصل
 
يا هلا و مسهلا بأبن العم

ونتطلع لمشاركات و إسهامات دسمه

مثل هالمشاركة

شرفنا و سعدنا بك بيننا


الساعة الآن 11:57 AM

Powered by vBulletin® Copyright ©2000 - 2024, Jelsoft Enterprises Ltd.
Content Relevant URLs by vBSEO TranZ By Almuhajir

Ads Management Version 3.0.1 by Saeed Al-Atwi

لتصفح الموقع بشكل جيد الرجاء استخدام الإصدارات الاخيرة من متصفحات IE, FireFox, Chrome

Security team

vEhdaa 1.1 by NLP ©2009


1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48 49 50 51 52