اللي على بالك على بـال مغليـك=نبغى الوصل وظروفنا مااسعفتنـا
انته تبي قربي وانـا ميـت فيـك=لكن دورة العيـش عنـك ابعدتنـا
عكس الطريق اللي يجيبك يوديـك=للصدفه اللـي جابتـك وجرحتنـا
قدامهـا ماكنـت متولـع فـيـك=ياليـن فرصـة وقتنـا جمعتـنـا
أصبحت احبك واكره انسان يطريك=اغـار والغيـره عليـك انكبتنـا
والمشكله بادلتني نفس ما اعطيـك=بـس الليالـي القاسيـة فرقتـنـا
خلتني ابعد عن وطنكـم واخليـك=لاني جهة دارك ولا انتـه جهتنـا
انته سكنت بدار ربعـك واهاليـك=بالمملكـة دار عـزيـزه ربتـنـا
وانا ورى لندن ولا قـادر اجيـك=نطلب اجازة والبشر مـا عطتنـا
لا وافق المعهـد وقالـو نمشيـك=الملحقـيـه بالطـلـب عقدتـنـا
قالو لكم رخصة اذا بيّـض الديـك=وعيا يبيض الديك فـي مدرستنـا
لكن خلاصة هرجتي مولـع فيـك=منساك لـو سـود الليالـي نستنـا

ياطير ياللي بالسمـا مرتفـع فـوق=تكفى طلبتـك شيـل منـي رسالـه
اطلع سما والحق على كـل ملحـوق=حتى تصيـر الأرض مثـل البيالـه
وانزل على دار نزل دون ساحـوق=دارالحروب أهل الوفـاء والشكالـه
ريف الخوي والضيف والعلم ماثـوق=عندي علـى ماقلـت علـم ودلالـه
اقلوبهم للي صفـا ريـش غرنـوق=وعلـى العـدو سـم تـورم حبالـه
وسلم وسلم لي على عقب مـرزوق=واختص عودي وانشده عن حوالـه
واسرع لعماني قبـل كـل منطـوق=وحاول تبـرز ببـو غالـب لحالـه
وان سايلك عني قل الطاق مطبـوق=جايـز ندبنـي بعـد شـي جرالـه
ياعم أنا قلبي مـن الهـم محـروق=وعزي لمن ظرف الزمان ارتكالـه
صبرت حتى أزريت والعبد مخلـوق=جاملـت عيـت لاتفيـد الجمـالـه
الشمس شمس القيض والغرب مشقوق=والبيـر هدمـت والعـزا بالمحالـه
وبضاعتي بارت قبل لانزل السـوق=وأسباب ماعانيـت طيـب وجهالـه
لأجل الحميه ماطلبنـا بهـا حقـوق=والله يعيـن اللـي رفيقـه حثـالـه
قلنا يبا ينـدم بعـد وقـت ويفـوق=لكن تمادى ليـن صـارت طوالـه
وشرهت أنا عاتق ومعتق ومعتـوق=لكن زمـان اليـوم مامـن رجالـه
راحوا هل الطولات والعلم والـذوق=اللـي يخلـون الصعايـب سهالـه
وراعي الغنم ماهو مثل راعي النوق=ماكل فارس قـوم قـام وغـزا لـه
وراعي الاباعرجوه قوم لهـم شـوق=أن ماكسرهم روحـوا فـي حلالـه
حصلت لي دانه لها بوسط صنـدوق=(الطيب مع بعـض الاوادم خبالـه )