على طريقة :[ يانقـول ابـداع والا مانقـول] = جيتك بشعر ٍ يفتـن الحرّيـف قبـل المبتـدي
شاعر وعندي فلسفه تصعب على بعض العقول=الشعر كنه عبد لافكـاري وخاتـم فـي يـدي
يلقى الفضولي في بحر شعري دواعي للفضول=والحاقد يـدوّر ويتعـب مالقـى صيـد ٍ ردي
همّي من اول ماكتبت الشعر ماهو بالوصـول=ابغى الوصول المستحقّ المستمـرّ السرمـدي
مااحب اصير الموضه اللي تظهر ايام وتـزول=احب اصير الشاعر اللي ذكـر قيفانـه مـدي
مالت على اللي مالـشعره لامسار ولاميـول=من وين ماطبّـل لـه الطبّـال تلقـاه يعـدي
انا بدوي ٍ ماني بمن قوم (باك) وقـوم (لـول)=ولانيب من يستشهد (بتذكار) و (منين ابتـدي)
اورّد الهرجه من علـوم النشامـا والزحـول=وان جيت ابستشهد من اذكار الصحابه مشهدي
والله لو ان المسأله على الاسامـي والفعـول=تلقى مكاني بالشعـر بيـن الثرّيـا والجـدي
لكنها تبغى فكر راقـي علـى شويّـة قبـول=والا تـراك بمعمعـة نظّامـة القـاف تغـدي
اقنص بنات افكار شعري قنصة الريم الجفـول=بنات فكر ٍ ِبكـر اطوّعهـا برايـي واجهـدي
متعوّد اقبل بالحلول ولااقبل انصـاف الحلـول=افكاري اخذها ِبكر توخذ مـن النـاس ابعـدي
شعري مميز فيك ياام الحسن والطرف الخجول=وان كان مالك معرفه بالشعر روحي وانشـدي
قولي لهم (سلطان بن بتلاء) سمعت انه يقول :=كذا كذا كذا كذا .. هـاك القصايـد واسـردي
اما يقولون ان ذا شاعر مـن كبـار الفحـول=والا بذكّي شعري المغمور واذبـح لـه فـدي
اخسر قصيد اخسر عمر عادي ولكن الحصـول=على قليل من الغلا في خافقك هـو مقصـدي