ديوان الشاعر خلف الفريد ( قصائد )

هذه القصيدة قالها شاعرنا بهذه المناسبة ويقول

ابو ماجد الخال ضيف الله بن علي بن حامد الفريدي استشارييّ مجالس الفرده
له جهود مشكوره ومواقف محموده ولانني مضى فترة وانا لم ازره احسست
انني مقصر ، وخوفاً من المساءله ولانه بحق يستاهل الثناء اهديه هذه الابيات على عجل :

الطّيب لو هو بين الاجواد موجود=باكناف ضيف الله عزيزٍ مدلّه
زودٍ على حالي سجاياه به كود=مثل الجبل هيبه وقوه وطلّه
دون الجماعه حد سيفٍ وبارود=وللي بكبده علّةٍ دوم علّه
وفي واجبه يبذل مساعيه وجهود=وله موقفٍ يشبه ثبات المسلّه
ابنٍ وفيٍّ للمجالس ومحمود=وفي خدمة اسمٍ كلبونا نجلّه
وان جيت بيته واردٍ قبلك ورود=من طاب في قوله يطيب بمحله
ولاني على ماقلت طلاّب لشهود=كلٍ على ماقيل قلبه يدلّه
وياخال سامحني على النقص والزود=ان شفتها ياخال فوق المظله
واعداد ماساقت ذعاذيعها النود=صلوا على المختار منهج وملّه

....

هذه القصيدة قالها شاعرنا بقلبا حزين ويقول

لقد فقدت اخاً عزيزا وقبلي فقدت قبيلة حرب منبرا من منابرها العاليه ...
انه اخي ووالدي شاعر حرب الكبير : متعب الديري ::ابو فهد::
عزائي للدّيَره جميعاً ولابنائه فهد وخليل وخالد ولجميح اسرة المرحوم ....

لا والله اللي غاب نور الفحيحيل=غدا به اللـي مايحـذّر نذيـره
اقفى به اللي ماتـرده مداخيـل=وخلى النفوس اللي توده كسيره
اللي تعود قطف روس الرجاجيل=ولا هو يفرق بين متعب وغيره
ابو فهد ماهو بحاجـه لتدليـل=الديري اسمه شمس في كل ديره
راعي هلا والهيل نسل الحلاحيل=ومن اطيب الاجواد معدن وسيره
ريف الرجال اللي تحب التعاليـل=اهل المواقف والوجيه السفيـره
عنده صعيبات القضايا تساهيـل=واليا ارتكى شال الحمول الكبيره
ماقولها حـبٍّ لبـدع التماثيـل=راضين بالمكتوب شره وخيـره
ياما فقدنا من سيوفٍ مصاقيـل=وياما تجرعنا الكؤوس المريـره
وياما تعبنا من عنا الحط والشيل=واليا نسينا هم جانـا خشيـره
لكن زمان اليوم به هدّة الحيـل=والآدمي يجهل نهايـة مصيـره
الموت حق ولا لنا عنه تبديـل=والدرب واحد والمسافه قصيـره

............
انا لله وانا اليه راجعون

هذه القصيدة قالها شاعرنا بهذه المناسبة الجميلة

الى من جعل للتحدي معنى وللفوز طعم
وللنصر حلاوة وطلاوه ...
الى حرب الام ورجالها الافذاذ ....
الى من وعد فاوفى وعاهدناه فصدقنا ....
الى شاعر حرب وفخرها .....
الشيخ النقيب / زياد بن حجاب بن نحيت
.....
((( حامل البيرق)))

البيرق اللي عانـد رجـال ورجـال=اليـوم باليمنـى القويـه رفعـنـاه
يمنى الشطير اللي وفـيٍّ ليـا قـال=نسل الشيوخ اللي بحـربٍ مسمـاه
ابن نحيت اللي تسنـد علـى جـال=يومه عطانا الوعـد حنـا عطينـاه
ركنٍ ثبت بين الفريقيـن مـا مـال=ولا حاد عن نهجه وطبعـه ومبـداه
هادي طباع وداخلـه ثـورة ابطـال=يرقا سناد وعارفٍ موضـع خْطـاه
ماغرته ضحكـه ولا اغـراه مـوّال=ولا راق ماء وجهه ولا ضيع الجـاه
متسلـحٍ بامجـاد واقـوال وافعـال=وبـلابـةٍ مايعـرفـون الـمـراواه
ويامنتخي في حرب حركـت زلـزال=وثوّرت بركـان الوفـاء والمثـاراه
دون اسم حربٍ نرخص الروح والمال=واليا زهمنا زيـاد ..جينـاه جينـاه
هاذي رسالة شات وهـاذي بجـوال=وذي دعوةٍ من طاهر القلـب مهـداه
مهمةٍ شَمّـر لهـا شيـب وعيـال=يوم ادركوا كبـر المهمـه ومعنـاه
ولا انسى رجالٍ بالمواقف لهم حـال=من نعرفه باسمه ومـن لا عرفنـاه
ولا هي غريبه وقفة العـم والخـال=وياهل الوفـاء وقفاتكـم لاعدمنـاه
ومبروك ياحرب المعـزه والابطـال=الكاس من يمنى الفلاحـي خذينـاه
فخر لنا يبقـى علـى مـر الاجيـال=دوري تحـدّي بالنهايـه كسبـنـاه

هذه القصيدة قالها شاعرنا بهذه المناسبة ويقول

الشاعر الوردي علي الجضعان اذا تكلمنا بالرومانسيات هز راسه وقال خلك
من الامور هاذي ماهي لك ...قهرني!!
لذا اهديكم هذه الغزليه التي اعتبرها حقيقة من المعلقات الراقيه ...وهذا لايمنع
من قليل من المجامله مع شايبكم .... عيالي

يازين لو تاخذ من القلب مزعه=والله فلا اشكي منك ، وانقل صوابي
لاصرت تملك مني اليوم بضعه=انا اعتبرها حاضري في غيابي
احمل شرايين الغلا وانت نبعه=وانا ظما الملهوف وانت الشرابي
اجوع وآكل لكن الروح شبعه=ضحكة عيونك والثمان العذابي
من يشكي الغربه وهو بين ربعه؟؟=لكن بلا لاماك طال اغترابي
ماكنت ابا ارضا لو تبلّلك دمعه=وانا نزيف الدمع بلّل ثيابي
لاقيل دايم يتبع الاصل فرعه=انته اصل عمرٍ فروعه شبابي
والحب في عرف المحبين شرعه=شوق وغرام وتضحيات وعذابي
غريب دار ولا يبي منك منعه=يبا الضيافه يوم قلّ الزهابي

..............

هذه القصيدة قالها شاعرنا بهذه المناسبة

صحيح ان بعض آلامنا من اعلامنا وبعض جراحنا من رماحنا ..
ولكن الالم في المفاصل والنزف متواصل ..
ومع ذلك مازال هناك بصيص من امل ، وثقة بالله عز وجل ...
وهذه زفرات حرّى اهديها الى (رهين الثلاث) حصار الجو والبر والبحر ....
الى حيث الصمود والشموخ والرباط ...

(((رهين الثلاث)))

ياشعب غزّة صبر ياشعب غزه=مابه صلاح الدين يأتيك غازي
يكفيك صامدْ تحت الاخطار عِزه=وتكفيك روسٍ مانحنت باعتزازي
مانملك الا دعوةٍ كل حزه=بالمسجدين اللي بعمق الحجازي
وشعب العروبه بين هزه ورزّه=وانته تقلب فوق جمرْ وقزازي
يموت مع هزات نجوى وعَزه=وغزة تعيش الموت والاهتزازي
ولا بيننا اللي كم ثوبه منزه=هذا قصير الباع وهذا انتهازي
واعلامنا المهزوز مع كل هزه=ايضيّع المحور مع الارتكازي
حتى مشاعرنا غدت مُستفزه=مابين عَرض اشلاء وعرض المخازي
ولولا الامل لأقول ياشعب غزه=تقبلوا فينا جميل التعازي
وسلام من دار الوفا والمعزه=ياشعبنا اللي في صموده اعجازي

.........

ويقول في هذه الرائعة البليغه :

مايجرح الانسان مثـل الاهانـه=ان جته من شخصٍ يعزه ويغليـه
لو هي كبيـره يعتبرهـا ميانـه=مايدري ان القهر توجع مكاويـه
والمشكله لاصار صعـبٍ مكانـه=وليا خسرته ماتحصـل ملاديـه
واحيان تاتيـك الخطيـه لعانـه=من واحدٍ دوبه يحـرك علابيـه
خبلٍ كثير المـال حولـه بطانـه=تطغيه واللي عنده المال يطغيـه
لاصفقوا له صار عنتـر زمانـه=ومن عادة الطاووس يفرد جناحيه
ولو ان ماله بين الارقـام خانـه=يشوف نفسه فوق كل المشاريـه
وعلى ضعيف القوم مابه ليانـه=وعند القوي يرخي اذانيه ويديـه
والا الذي دايـم يلـوّخ لسانـه=ثورٍ مغمّـم يـدّرج دون توجيـه
اليا نصحته جـاك زايـد جنانـه=حتى حبـوب التهديـه ماتهدّيـه
ان ماكبح بين الحضور اجمحانه=ودك على مقرن حجاجيه تعطيـه
والادمي قالـوا لسانـه حصانـه=اما جلب له خيـر والا يدهويـه

هذه القصيدة قالها شاعرنا بهذه المناسبة ويقول

اقام والدنا الشيخ / زيد بن محمد بن حماد امير الهميج حفل تكريم للشيخ /
سلطان بن سعيّد بن مريزيق الحيسوني بمناسبة تعيينه شيخا لقبيلة الحسنان من بني السفر من
مسروح من حرب ، وقد كان حفلا رائعا في كل شي ولله الحمد ، حضره شيوخ قبائل ومسؤولين
واعيان وجمع من المحبين من كل المناطق


وهذه مشاركتي في الحفل ::

بسم الذي ترجيه كل المخاليق=جزل العطا يوم الوهايب شفاقه
منه استمد العون في حزة الضيق=ويزيدني عزم وثبات وطلاقه
والشعر روضٍ فيه كل الزماليق=وانا قطفت من اجمل الشعر باقه
لاطالبٍ شهره ولا اريد تسويق=ولا موصّفٍ جيبٍ ولا زَين ناقه
ولا احمّل بيوت الشعر فوق ماتطيق=ولا اتجاوز فيه حد اللياقه
شعري مصخر للرماح الزواريق=روس الرجال اهل الكرم والنزاقه
الصدق مايحتاج لمسة مساحيق=والمدح بالغالين حلوٍ مذاقه
ويامرحبا ياهل الوجيه المطاليق=في دار ابن حماد رمزالعراقه
شيخٍ بطيبه طوّق الكل تطويق=زيد المحبه والوفا والصداقه
راعي بغاديدٍ سوات الغرانيق=وريف الصيان اللي كبارٍ حلاقه
يقرط بهن حيلٍ وحشوٍ مدانيق=بمقلط مافيه صغر وضواقه
والتهنيه مني لحرّ الشواهيق=اللي يسر العين عند انطلاقه
سلطان سلطان السعد والتوافيق=العقل راجح والتعامل لباقه
شبلٍ ورث تركة سعيّد مريزيق=شيخه وطيْب وليّنٍ للرفاقه
وياربعنا الحسنان مافيه تعليق=الا انكم رمز الفخر وانبثاقه
كان انكم على الجماعه مشافيق=تقودنا لكم السلوك الدقاقه
ويشدنا حبٍّ بجوف الصناديق=مع عزوةٍ في روابط علاقه
بني السفر جدٍّ وعدٍّ وتوثيق=ابن الخيار وكلنا لحم ساقه
ماهي علوم ملفق الهرج تلفيق=على الحجاوي يستند والحماقه
يقولها اللي عارفٍ بالمعاميق=ولا يهمنا لو مال قطّاع ساقه
واليا اجتمعنا حرب مافيه تفريق=الدهن من عود البخور اشتقاقه
اهل الولا والدين واهل المواثيق=والجود نبعٍ عاشقينه عشاقه
وصفحاتنا بيضٍ ليا صار تبريق=وحب الوطن مسكٍ عليها اندفاقه
كل ما اعتلى حرٍّ على قمة طويق=يلقا الوفا ماهي عهودٍ رقاقه
والله يعز محقق الامن تحقيق=ويحرق قلوب اللي يبون احتراقه
اللي مواقعهم ظلام السراديق=ومنهاجهم دربٍ كثيرٍ زلاقه
وصلوا عدد ما لاح نور المشاريق=وعداد دورات القمر في نطاقه

على حبيبٍ سيرته دوم تشويق=من نفتخر في منهجه واعتناقه

هذه القصيدة قالها شاعرنا بهذه المناسبة ويقول

مساء يوم الخميس الموافق 19/5/1430هـ وعلى اثر دعوة كريمه تشرفت بحضور الحفل الكبير
الذي اقامه في مدينة الخفجي الشيخ/ مبحل بن خليف بن دهيم العلوي الحربي على شرف
الشيخ / عبد الله بن ثلاب العلوي امير السيح التابعه لمحافظة النبهانيه بمنطقة القصيم بمناسبة
تعيين نجله الشيخ نايف رئيساً لمركز السيح ، وقد كانت امسية جميلة ممتعه حضرها اعيان من
حرب ومن قبائل الحفجي كما احياها مجموعة من الشعراء وعى رأسهم شاعري حرب الكبيرين
الصديقين الكريمين ، جوهر بن غالب العلوي وسعد بن خالد الصرم العلوي ، وقد شاركت في
هذه المناسبه بهذه الابيات الخفيفه ضمنتها مشاعري وذكرياتي هناك ....

وصلتني الدعوه من اغلى المقامات=ومناسبتها اكرام روس القبيله
والملتقى الخفجي وهالاسم بالذات=له موقعٍ بالقلب ماحدٍ يزيله
دار المحبه والكرم والمروات=ودار الوفاء والذكريات الجميله
دارٍ بها شمّ القبايل منارات=اهل النفايل والفعول الجليله
مناجم ابطالٍ وبالطيب سادات=زحول الرجال اهل الحمول الثقيله
وعن الاجابه مالنا اعذار هيهات=وحتى الاجابه نعتبرها قليله
مايردنا بعد السكن والمسافات=هو عذر لاقلنا المسافه طويله ؟؟
فرصة عمر من حظنا يوم هي جات=ومشاهدٍ يشف الكبود العليله
ويوم ان بعض الناس عند المهمات=ماتوصله رجليه راس الطويله
يقضي حياته كلها نوم واسكات =بين الدوام وبين حضن الحليله
ابو خلف له بالمواجيب قومات=حصان حرب اللي طويلٍ صهيله
له مع طريق المجد روحه وجيات=بعزم وصلابه والمكارم دليله
راعي دواوينٍ كبارٍ وسيعات=ومشرّعاتٍ كل يوم وليله
مدهل كبار القوم في كل الاوقات=وملجا غريب الدار عابر سبيله
ولا هو لضيفانه يقدّم بلامات=دوب الصيان البيض تشفي غليله
والليله الفرحه براهين واثبات=الطّيب غايه والكرم له وسيله
على شرف شيخٍ شبوحه بعيدات =سيفٍ لمع بين السيوف الصقيله
الشيخ بن ثلاّب نسل الزعامات=نايف ونايف نافلٍ كل جيله
من شاطي الخفجي ليا ضلع ابانات=ننثر له الباقات مثل الخميله
وهاذي مشاعر شاعرٍ صاغها ابيات=ممزوجةٍ بالهيل والجنزبيله
ان جمّلت ،توفيق رب السماوات=وان قصّرت ،جهد المحب وحصيله

وعدّ النجوم اللي حوتها المجرات=صلوا على المبعوث خير وفضيله

هذه القصيدة قالها شاعرنا بهذه المناسبة ويقول

وموضوع القصيده من ضمن مكارم الاخلاق الحميده والصفات المحموده وخصلة من
خصال المسلم الجميله ، وتلك هي فضيلة:

((( التسامح )))

رفيقك اللي يعتذر منك لاجاك=ادمح له الزله وصافح يمينه
وخل الموده باديه من محياك=وابليس لايختال بينك وبينه
اياك تعطيه القفا اياك واياك=تغلظ له القول الشنيع وتهينه
ولا تمنحه فرصه يعدّد خطاياك=ولا تذكّره باخطاه لو هي دفينه
لاتسحب الفرصه على حيود واشواك=كم فرصةٍ راحت فوات وغبينه
وخل العتب بينك وبينه تضحّاك=العفو هو طب القلوب الحزينه
لعلها خيره ليا طاب مسعاك=المنهج الطيّب وقار وسكينه
يمكن تبين سلوك من بينكم حاك=ثوب القطيعه والحسد والضغينه
ولا صار لك خبره وعرفٍ بدنياك=ياما بها من اشباه "رهط المدينه"
كم واحدٍ يضحك وهو صانع اشراك=يلعب على الحبلين "تبّت يدينه"
نوبٍ صديقك يدخل بحسبة اعداك=اليا انقلب ضدك وبيّن كنينه
ومن ينقل الشينه نقل عنك يم ذاك=مايردعه خوفه ولا احكام دينه
نصيحةٍ ويقولها صاحب ادراك=درّة حصيله من تجارب سنينه
وللمعرفه ناسٍ وللعقل ملاّك=نمشي على دربٍ ورا سالكينه

وصلوا عدد مادار جرمٍ بالافلاك=على النبي والآل يا تابعينه

هذه القصيدة قالها شاعرنا بهذه المناسبة ويقول

لاشك ان كل انسان له مباديء يسير عليها ويثبت على منهجها دافعه الى ذلك دينه واخلاقه
وهذه الصفات المحموده مطلب كبير لايتحقق الا بالعزيمه والثقة والاصرار ، وهذه الكلمات
حاولت ان اعبر فيها عما يختلج في صدور اصحاب الهمم .

((( الهمّة العاليه)))

اليا بغيت اقوم واسرجت خيلي=ما ارخي عنان الخيل حتى اتساوى
واليا عقدت العزم جوّدت شيلي=لاخير في كثر الحذر والمراوى
ولا احط عن سيف الشجاعه بديلي=لا قامت سباع الفيافي تعاوى
واليا ارتفع راسي رقيت الطويلي=ان عوّدت نظرات غيري تهاوى
واليا جهلت الدرب قلبي دليلي=ولا اخاوي الا طيّبين المخاوى
واللي لنفس الزوم يالله يشيلي=ماهو رفيقٍ لي صعيب المداوى
واليا جرحتني كلمةٍ من خليلي=ما اسوق رجلي لين روحي تشاوى
ومن عادتي رد الثنا والجميلي=واليا وصلني واجبي ما تزاوى
ولا ني من اللي يحملون النقيلي=اللي ضمايرهم خرابٍ تجاوى
والمجلس اللي فيه قايل وقيلي=سيلٍ محدّر ما يفيده محاوى

وترى كثير الهرج حطّاب ليلي=مع الحطب جاب الهوايش تلاوى