الوفاء والطيب بصدور الرجالي=مثل ريح العود وإلاء الجاونيه
والحرار اوكارها روس الجبالي=مايضيق الكون ورحابه فضيه
اتعلم من تصاريف الليالي=وادمح الزله وألحقها الخطيه
لين صدري صار من صبري شمالي=الزمن غدار والطيب ضحيه
كم غدالي من الرجال وكم بقالي= وكم عزيزٍ راح وافته المنيه
اتصبر لين مايدني زوالي= واطرد اللي راح وألحق فالبقيه
جيت للدنيا وابتركها لحالي=عزتي بالله وبالنفس الغنيه
هيه ياللي مانت اغلى من غدالي=رفقتك ماهي على مثلي خفيه
مثلك ادري ماصفالي لو صفالي=لو عطاني الشمس والقمراء بيديه
اكره المغرور واللي به تعالي=وابغض اللي فيه نظراتٍ دنيه
ورفقت الطيب مثل شرب الزلالي= تروي الضميان من جمٍ رهيه
آه لاصديت واللازم بدالي=والتزمت الصمت والشرهه قويه
كل ماحاولت مافيها مجالي=قلت وينه لابغيت العين حيه
قلت وينه وين ابا زيد الهلالي=ولالقيت اللي لها ويلد ليه
مالقيت اللي عليه ارمي عقالي=في عيون الخلق شفت المنكريه
ياوجودي كل مالطيب طرالي=وجد من وصى على عياله خويه
وياوجودي كل ماسميت غالي=قالو إنه مات وحظوظه رديه
لاترك ثروه ولاعقب عيالي=ودع الدنيا ولاوصى وصيه
اكتب الاشعار من باب التسالي=والا بعض احيان قصه واقعيه
لو يقول الشعر بعض إلسان حالي=كان ماغنيت وجروحي نديه
يحسبوني من جميع الهم خالي=يوم سمعوني اجر السامريه
والقصيد يجول في ساحة خيالي=ماخبرت اللي على الخاطر عصيه
مير انا بالله اعلنت إتكالي=وماعلى غيره ليا ضاقت شكيه