ياللي تهلي بي هلابك وحييت = قولة هلا عندي لها منك قيمة
يوم انكم مجلس هل المجد والصيت = ماهي سواليفٍ تذب الخريمة
اقول واقابل وعندي تثابيت = والناس كلٍ له معزة وشيمة
علمٍ سبقني به نطيح الزناتيت = في ساعةٍ كبده سواة الهشيمة
شد الاصيل ووقت الوقت توقيت = كبدٍ سقاها وكبد ظلت محيمة
ماشافت فعل العنقري لكن اوحيت = سوالفٍ بقيت لاهلها مقيمة
والا الكلام ان دلني ماتواريت = الوسط من صف الجماعه غنيمة
عندك رجالٍ للمعاني نواحيت = اهل وفا كلٍ يمثل وسيمة
بظلال سلطانٍ لكم شيد البيت = عد الوفا واجب وتركه هضيمة
لكن فهمي بينكم لو تقصيت = عندي مثل راس الجمل بالشكيمة
من قال انا الكامل ولو كان عفريت = روايته عميا ضعيف وسقيمة
يظهر على العفريت مثله عفاريت = بالكاس يسقونه مرار الهزيمة
صبحية انه ممسيٍ كبر حليت = ارق والين من نقيض الجميمة
هذا حسب عرفي وانا ماتحديت = الحكم يبقى للرجال الحكيمة
لاقيل لي زليت والا تماديت = الكامل الله والجوارح سليمة
ليا منهم قالوا هل العرف زليت = لوما بها نمة ولاهي ظليمة
بدلول سمحين الوجيه استدليت = وجبت الطمانه في محل التميمة
على الضريح وصفوة الخلق صليت = طلبت من ربي عساها يتيمة
من شان ما تكثر على المشاليت = مره تصيب ومرتين تحطيمة
الاضماير همصعيٍ مباحيت = فيهن تعيش الطيبة والذميمة
انا ليا مني عن القاف رديت = ولقيت فيه من الخرايم خريمة
اخذت لي مدة وانا ما تجريت = بالقيل كني عاملٍ لي جريمه