يامتعـب الشعـار يابيـت القصـيـد =لـولا تعبهـم فيـك ماجالـك طـراه
كم لي وانا ادور على معنـى جديـد =ماكل مـن دور علـى الطيـب لقـاه
لو كل من يحذف حصاه يجيب صيـد =ماكـان نحتـاج البنـادق والـرمـاه
ولو ينصرف في البنك شيك بلا رصيد= كلٍ طمع في الدر الأصلـي وإشتـراه
لعيون من يبحث عـن الـدر الفريـد =هذي وصاه لمن يحفــــظـون الوصـاه
يمكن ليـا نصبـت موازيـن العبيـد =ترجح بميزانـي ويكــــتَـب لـي نجـاه
ايامنـا ماكلـهـا فـرحـه وعـيـد =وإن عشت يومك ماضمنت اللي وراه
والرجل مهما عاش في الدنيا سعيـد =لابـــــــد مايحتـاج ربـعـه واقـربـاه
لاتقطع ارحامـك ويشملـك الوعيـد=ولاتخسر الغالـي ولاترخـص غـلاه
واخوك لا تخسـره لـو إنـه عنيـد =يخطي مية مره وتسمـح لـه خطـاه
وإن كان شد الحبـل حـاول ماتزيـد =ارخيه قبـل الشـد يوصـل منتهـاه
ولا تنصحه وقت الزعـل مايستفيـد =واعرض عليه النصح في ساعة رضاه
وليا طلب رايـك عطـه رايٍ سديـد =وإن ماطلبك الـراي لاتبحـث خفـاه
واعرف ترى قرب المنـازل مايفيـد =واحيان يبـدي شـي مـاودك تـراه
لكـن لاتقـرب ولا تـنـزل بعـيـد =خلك على قول المثل حذفـة حصـاه
واحفظ حبال الـود حفظـك للوريـد =اللـي معلـق فيـه موتـك والحيـاه
ترى الأخو مهما حصل يبقى عضيـد= وترى عيـال العـم ماعنهـم غنـاه
الناس دايـم ماتهـاب اللـي وحيـد =اللـي ليامنـه وقـف محـدٍ مـعـاه
لو كان في الميقاف عزمه من حديـد =لابد بعـض احيـان ينـزل مستـواه
وخذ الحذر لو كنت في قصـرٍ مشيـد =الذيـب لـولا فطنتـه كـلٍ رمــاه
لاتامـن الدنيـا لهـا مكـرٍ وكـيـد =يمكن تحدك صـوب شخـصٍ ماتبـاه
إليا رمتـك بوجـه شيطـانٍ مريـد =طاغـي ومتمسـك بقانـون الطغـاه
ثبت عليه شهـود والخالـق شهيـد =لا تندفـع للشـر وتسـوي كـمـاه
وإتبع دروب الحـق عنهـا لاتحيـد =ويبين راعي العرف من راعي العيـاه
ولاتبدي اسـرارك لزيـد ولا عبيـد=من يحسدون الرجل فـي زاده ومـاه
لاجـوك قـول الله يدبـر مايـريـد =ولاتعرض الدعوة على غير القضـاه
إلا على شيـخٍ ولـه عقـلٍ رشيـد =وإلا على مطنوخ له منصـب وجـاه