الشعر في شرعي فكر .. والفكر بالشرع الاصيـل = نهـج العقـول الناضجـه والعاقليـن أدرى بهـا
مو شرط من يكتب شعر يدري عن بحور الخليـل = اللـي يـداوي علـتـك لا تبلـشـه بأسبابـهـا
احد(ن) على الحنده حدا .. وحد(ن) على الشله يشيل = كلن علـى مـا يكـرب بيوتـه يمـس اطنابهـا
على سبيل اهل المثل مانـي مثـل اهـل السبيـل = اللي معانـي حضورهـا تشبـه معانـي غيابهـا
لا غبت جبت وعادتي لا غبت مارجـع بالهزيـل = ان جبت اجيب اللي محـد قبلـي بالشعـر جابهـا
تعشقني الفكره بكر .. واسبق لها الـوزن الثقيـل = اللي بنـات افكارهـم مبطـي رميـت حجابهـا
اهيـم فـي واد الدهـا واروي حديـث السلسبيـل = يوم ان غيري جامع(ن) كتب الشعر يقـرى بهـا
ما بالقرايـه رايـة(ن) بيضـا ولا منهـا ذبيـل = لا روحـت خيـل الطـرد تبكـي علـى هذابهـا
بعض المعاني وقعها اشطر من السيـف الصقيـل = يوم السيوف مـن الهلـع تثقـل علـى قضابهـا
ناس(ن) على الشعر دخلت والشعر بي منهم دخيـل = يقول انا بوجهـك عـن الهزلـه وعـن كتابهـا
ومدام صارت تشكي العلـه مـن اسبـاب العليـل = قل للجماعـه ترمـي ثيـاب(ن) ماهـي بثيابهـا
ماهي بلحيه طشطشه سيل(ن) من العارض يسيـل = اسقـى جبـال المملكـه وسهولهـا وهضابـهـا
فان قيل ابو ظبي ابرقت وعيـون اهاليهـا تخيـل = قولو لهـا عينـي لهـا مبطـي تـرف اهدابهـا
مساكـم الله بـالادب والـذوق والشعـر الجزيـل = من شاعر(ن) صدره يسعى مكه ومن يسعى بهـا
شاعر شمالي وقفته عـن لابتـه تشفـي الغليـل = يدرى زعلهـا ويحمـى عنهـا ويخشـى عتابهـا
في ميله عقاله ثقـه وبفطرتـه صبـر(ن) جميـل = يحسب مسافـه صيدتـه واليـا رماهـا صابهـا
انا البديـل لعمـر بـن كلثـوم لـو مالـه بديـل = لا قامت فحول الشعـر تفخـر بطيـب انسابهـا
لا المستحيـل يردنـي ولا ابـن عـم المستحيـل = ياما كسـرت القاعـده واخلفـت وجـه اعرابهـا
صدري ليا عليت على واليا استطالـت يستطيـل = اما استـوت لـي كلهـا ولا بـلاش اشقـا بهـا
عندي قناعه ظلهـا وافـر ولا لـي فيهـا مقيـل = مامشي ورى قالـو قبـل واعيـش فـي جلبابهـا
ما من ورى زرع المثل في وقتنا الحاضر حصيل = من طبق امثال العرب هـذا الزمـن يبلـى بهـا
من ذل لو قالـو سلـم .. يبقـى بنظرتهـم ذليـل = ما تستوي القمـه تحـت رجليـن منهـو هابهـا
ايه الشجاعه تغلب الكثره وانـا اعطيـك الدليـل = الذيـب يـدرع بالغنـم ولا يحسْـب حسابـهـا
جيت بشموخ الوايلي ما جيت مـن تحـت الشليـل = ولا ردنـي عـن ساحـه الشعـار كبـر القابهـا
لو كل من اسمه جميل من العـرب يطلـع جميـل = كان اكثر اسماء العرب تحميل صفات اصحابهـا
ولاينعم بظل النخيل اللـي تحـت جـذع النخيـل = الشمـس تصقـع هامتـه حتـى يحيـن غيابهـا
ولاطولت عمر آدمي قولت عسى عمـرك طويـل = طول العمـار وقصرهـا رب العبـاد أدرى بهـا
رح ردها عنـي وانـا باكبـر عواقبهـا كفيـل= كان طلعـت كذبـه فانـا بيـن العـرب كذابهـا
ان الشجاعه تغلـب الكثـره وهـذا اكبـر دليـل = الذيـب يـدرع بالغنـم ولا يحسْـب حسابـهـا