هلا ياهجوس الشعر يامرحبا بالقاف=اشرّع لها البيبان وافتح مغالقها
ارتب قوافيها واعدي بها المشراف=وعلى شاشة المحمول باكر انّسقها
ولامن تكامل شدها ماعليها خلاف=ابروز لها بالنت صفحة والصِّقها
قصيدة جديدة مثل ماينقد الصراف=وجزيل احترامي والتحايا ترافقها
اشارك بها بالمنتدى والقلوب انظاف=قبل تعلن الساعة نهاية دقايقها
اوصف بها الضرغام واقول قول إنصاف=على ساقة قرومٍ على الصدق منطقها
اجاد الفريد الشاعر الفاهم العرّاف=ولاهان بن عجاب بيّن حقايقها
اسودٍ تمَثّل بالاسد لين تقل ايشاف=وكلن يجيب من التماثيل صادقها
صحيح الاسد حيوان لكن فعله ناف=مهابة مليك وكل الاخصام يرهقها
ليا من زأر بالصوت جا للجبال ارجاف=دوي المدافع صيحته يوم يزعقها
تهاوى الطيور ولايشيلنّه الاخفاف=ابا الاربع اللي لمحة الشوف يسبقها
غروره من فعوله وبأسه شديد اوحاف=هذي صيدةٍ يغتالها وذيك يعتقها
حكم غابته من دون حارس ولاسياف=بليا حكومه سلمت له بيارقها
عرينه يزيّن سوره القرن والاضلاف=وعلى ساحته صف الجماجم معلقها
وذكرت الاسد خطاب من جملة الاوصاف=بالافعال واللي عن جبينه يفرّقها
ولكنّ فيه اشجع منه سيّد الاشراف=مهو ظاهره بالكون واقوى خوارقها
قواه المهلل شال حمله على الاكتاف=وبنى رجم من روس الاسدّات واحرقها
واشوفه زمان اليوم يعطى من الاعلاف=رهين الحديقة واحدٍ من مرافقها