حييت يا بن العم شيمه ومقدار=يامرحبا يالقرم شيخ الرجالي
عظم العرب لاهنت يامكرم الجار=عند الشدايد عزوتي راس مالي
انته نسل عتاق ما تموت لك نار=كبير قدر وعندنا دوم غالي
ليا مالت الدنيا ودولابها دار=انته سنادي من يمين وشمالي
طبع الفريدي يحمي الضيف والجار=ومن الطناخه ما حسب للتوالي
ويا معاندٍ لعيال راشد لك العار=مالك حصيل الا العنا والضلالي
اليا اعتزوا افعالهم كنها اعصار=تهتز منها شامخات الجبالي
نمشي على الصعبات من يومنا صغار=ونموت دون العرض والراس عالي

حي الكلام اللي كما الغيث مدرار=من شاعرٍ دايم صدوق المقالي
تسلم يابو سلطان يانسل الاخيار=يا تاج راسي يا بعد كل غالي
ياعزوتي والله لو يصير ما صار=اني يمينك لا تدور بدالي
انته مقر الطيب كان الردي بار=وانته كبير الجاه ياهملالي
وان ضاعت الافكارمن كثر الاشوار=انته صليب الراي عقل وكمالي
وان جاء نهار فيه وارد وصدار=انته توردها شموخ ومعالي
وانته ولد راشد اليا قيل يا ثار=تهتز من يمناك صم الجبالي
واسلم وتسلم يابعد كل خوار=اللي مع الشده ضعيف احتمالي