مجالس الفرده - الشاعر / شريف يسند للشاعر محمد بن شعيبان

هذه القصيدة من الشاعر الكبير / شريف بن راكب

موجهه للشاعر المبدع / محمد بن شعيبان .

سويت لي توجيه في مبتدأ القاف=ولا امدح خطا ويصير مدحي ظلايم
يبن حمد مافيه داعي للاسراف=تعبت بين المنتدى والعزايم
تنشاف يوم وباق الايام ما تشاف=ومن طول الغيبات جاب الغنايم
لاجيت خبرني عسى مابك خلاف=ما فيه حيٍ ما اسئله عنك دايم
ولي حق يوم اني على مثلك اخاف=ولالي على الطيب ليا خفت لايم
ولا الوم من يسعى ورى كسب الاهداف=الا ليا كثرت عليه الهزايم
الذيب كم يركض وكم يهرف اهراف=ويصبر على برد الشتاء والسمايم
واليا حصل له طردةٍ عقب ماحاف=عود على صوتٍ يدن الهظايم
هذا وانا لي معك كلمه وميقاف=واصحى يكون بجوك الشك حايم
كلمة وفا احلى من لبن كل معطاف=بوادٍ خضر ممطور والجو غايم
هات الخبر ياصاح من كل الاطراف=على العلوم البيض قلبي مهايم
تراه محذورٍ عليك التلفلاف=بالكذب مالك يامحمد قدايم
انته شريف ومن طرف ناسٍ اشراف=قبلك عليك مسكرات الخرايم
لاحظت رجعت جيشكم وقت الانكاف=حفى الخفوف مصلبات القوايم
ورزة الخروج وكلها صارت اخفاف=وهذا خطا بنفوسكم والبهايم
وانذرك عن من عشرته وقت الارياف=لو كنت صعلوكٍ تدور الظمايم
لاجيت له لوكنت في حاجة اسعاف=اروغ من الثعلب لعين الرسايم
واليا سمع صوتك قرط فوقه الحاف=قولوا مريض ولاتقولون نايم
لاصار ماتكسب فالاسفار تنعاف=عرف الديار ولابسين العمايم
واعلم ترى العالم من الكاف للكاف=تسبح على لوحٍ ورى المال عايم
تم الكلام ولابقيلي تحساف=عساك ماتلقى عليه قسايم
وخذلك مثل نقد الذهب عند صراف=غير انت مغليهن على كل سايم
ابيوت من عندي جديدات ونظاف=في وسطهن تضميد جرح وحزايم
وتراك كد حكّمت واحكم بالانصاف=خلك كما اللي يدرجن النعايم
وكان المعاني يامحمد بها اضعاف=قلي هذاك وذاك فيهم هلايم
واحذر تعاتبني على المنطق الحاف=تسمع كلام مروجين النمايم
اخاف تحصل قصةٍ شرحها طاف=ياليتني عنها هكاليوم شايم
لقطة غليص اشتالها فوق الاكتاف=جابوه لي اللي عسى للثلايم
والهرج كله قابلٍ للتحراف=تكثر به الاهداف عند التهايم
وابا احلف لك كان تقنع بالاحلاف=يمين مظلومٍ بعدت جرايم
وحياة من نزّل تبارك والاعراف=انك خليل وبيننا الوصل قايم
وتراه ميّدني على الراي نواف=لولاه ما ذبّحت كل التمايم
واخير مما قلت من حج وطّاف=وصلى الفروض وواجه الرب صايم

وهذا رد الشاعر المبدع / محمد بن شعيبان الفريدي

حي الرفيق اللي تماثيله اعفاف=حذرات منقيات بيضٍ جسايم
شرهات نزرات وعلى عدة اصناف=ومخزمات اخشومهن بالزمايم
من شاعرٍ في بدع الامثال عسّاف=شريف محمد للامجاد رايم
من قدر راعيهن تقل در معطاف=ابا اعتبرهن كلبوهن سلايم
جزلات مافيهن هزيلات وصخاف=لو كل قافٍ للحقيقه ملايم
يابو محمد يابعد كل هلاف=اسمع لعلك ماتشوف الندايم
من ظامر اللي للثمينات هداف=مايهدّف الاطيبات النظايم
جابه صريحه مابها زيف واجحاف=ترضى بها عقول الرجال الفهايم
ما غبت عن واجب ولارحت سواف=ما فيه داعي للظنون الوهايم
رد الوفا عند العرب مثل الاسلاف=ماينكره كود الضعوف الخمايم
على النقا والعز في كل الاعراف=قدره وكاره للقلوب الحكايم
وطبايع العالم تفاخت والاشواف=وهبه من الله ماترهم رهايم
ان كان تقصد بالوفاء جمع الاولاف=انا اهدفي مرضات ربعٍ حشايم
وكسبت عرف ديار ورجال عراف=فيهم على الطولات قوة عزايم
ولولا الوفا الرفقه تعرض للاتلاف=ورفقة هل المقصد تعود هدايم
واكبر غنيمتنا الوفا ماله اوصاف=حشمة رجالٍ تنحسب باللزايم
وارافق اللي للجزيلات ميلاف=ماني رفيق الخامدين الظرايم
حق النظر واطلع على راس مشراف=مافيه امورٍ ياشريف عظايم
دعواك ماتحتاج ناظور كشاف=لانته بمظيومٍ ولانته بظايم
وانت تحذف قدام وتناظر اخلاف=تنذر وتفتح باب لهل الشتايم
اعلومك اللي بين جد وتعجراف=بيني وبينك ماعليهن كتايم
عندي خبر ما انته على جال مهياف=لكن ياعقب مطوّعت كل زايم
مهما حصل لون مابنودنا اقضاف=احسب لها لاذعذعاً النسايم
قدام لايعطيلهن كل ملقاف=اللي لهن لوما نصنه تطايم
يحرّف الكلمه على شر محراف=وعلى حسانيها يحط الردايم
هماز لمازٍ كذوبن وبلاّف=العوج سلعه للنفوس السقايم
حلوقهم على ارخص الهرج نشّاف=مشاركه بالسلم سمر اللثايم
يم النفاق يجرهم سلك شفاف=وبعراض خلق الله عيالٍ صتايم
وبعض العرب يرجف على الحروه ارجاف=باسبابه الطيب يسوق الغرايم
حذراك ثم حذراك من بعض الاصداف=وقت الرخا ينذر بوقت الزحايم
دنياك ماتصفي ربيعٍ ومصياف=من غدرها كم راح حيٍ حطايم
وخذ للسّباع سيوفٍ احداد ورهاف=وذهن لهن لاتروح روحك لهايم
واشتر تبيع اجزال لو طالك اكلاف=ولا الطيب مثلك من ركابه همايم
وتطلبني احكّمك قضية بالاطراف=ماتوخذ الغايب حقوقه قسايم
خل الخبر يشرف على قور وشعاف=ولاتروّح الخطر بعضها كظايم
لاعلم ينقص ولاعلمٍ يضاف=لو الخبر مايستحق الزعايم
ذكرتني كلمة رجا الله لصياف=وعن ما طرى بيض النوايا عقايم
ولا ودّي اذكرك بيام زلاف=ماراح من بعض الدلايل علايم
شايب ومن ربعي ومن خيرة اسلاف=وخذت درس من السنين الصرايم
ومن كرم الضيفان يشره اليا ضاف=حيل السوالف نوب تنجب توايم
غلفتها من شان خاطرك بغلاف=ومن شان خطّر طيبين الزمايم
وعندي ثقه ما انته شكوكي ومزهاف=قبل تحلف بايات محي الرمايم
ومشكور ياشريف ومشكور نواف=يا اهل العلوم الطيبات الجسايم
واقبل سلامي عد ماهل هتاف=وما لاح برقٍ في مزون الوسايم