بعض الآوادم .. معرفتها خسـاره=مامن وراها غير زود المخاسيـر
وبعض الآوادم .. معرفتها تجـاره=يغنيك عرفه .. عن كثير الدنانيـر
كل آدمي عقله .. يحـدّد مسـاره=وعلى ولي العرش كـل التدابيـر
يمشي الطريق برغبته وأختيـاره=راضي لحاله .. لو تطول المشاوير
الطيب عسـر .. ونايـداتٍ ديـاره=ماجولها كـل الرجـال المداويـر
يقطعك رجلٍ .. ماعرف حق جاره=ويهدمك بيتٍ .. ما لفوله مساييـر

( غازي الرويلي )

البارحه عديـت لي راس قاره= وخط القلم بالطرس حرف ٍ بتقرير
وولعت من راس الفتيله سيجـاره=باسباب خطٍ غير وصاحبـه غيـر
جاء من رفيقٍ شهم راعي نعـاره=ابن الحـرار الطيبيـن المناعيـر
نسل اهل العليـا رجـال النـداره=عز الخوي والجار ريف المساييـر
بعض العرب لو هي بعيده ديـاره=مثل الفياض المزهـره بالنواويـر
علمه يبين بطيب سيرة اذكاره = كريم وله عند الرجاجيل تقدير
يغنيك عرفه عن خطـات الهـذاره=اللي عن الواجب كثيـر المعاذيـر
وراع الردى لو طاب واضح مساره=خالف اخطاه وبدل السير بالسير

(فهد الفريدي )

ياحـي مـن خطّـه صريـح العبـاره=الصاحب اللـي جـاب حلـو التعابيـر
جـاب الجزيـل اللـي ثقيـلٍ اعـيـاره=وفّـاه كيلـه مـن جميـع المعايـيـر
انـا اشهـد انـه للمـراجـل مـنـاره=زبونهـا .. عـن مدلهـم الدياجـيـر
حـرٍ معـرّب ‘ مركـزه بـ/ الصـداره=نسل الفريـدي مـن طـوال الآشابيـر
عنده على الطـولات عـزم وجسـاره=عن واجبه مـا يـوم جتـه المعاسيـر
يشهـد بطيبـه مـن يمـرّه زيــاره=يلقـى الـدلال بكـل حـزّه مباهـيـر
ما هو بـ/ اللي ‘ ما عسْ خطو السِّماره=ولا قِيـل : نبّـه بالعشـاء للخطاطيـر
ما غيـر للهزلـه .. يسـوق البشـاره=تفرح بها اشدوقـه .. عليهـا مفاطيـر

( غازي الرويلي )

صـــــــــــح السان الشاعرين
ولاهنت يافهد ولايهون الرويلي
تسلم على القول الجزيل
ومثلك يجيب الجزله الربعه
تقبل مروري