الفريد ارسل كلام ن للفريد=القبيلة والقلوب موحده
التحية والرضا من علي زيد=من فريدي مرسلات لفرده
ياخلف جيتك مسير من بعيد=في علوم طيبة متعدده
فسر المعنى عسى عمرك مديد=أنت طيب كل طيب تاجده
لاومرك الله وقررت الشديد=الحلل عن ماهجرته بعّده
مايعود للمراح الا البليد=وانت تكرم والمعاني وارده
لاتعود وأنت منته مستفيد=المقفي عنك بالك تطرده
ياوسيع العرف والرأي السديد=كان ماصبت الهدف لاتعاوده
دامتك شاعر وكفك من حديد=حط لك مركا وخلفك مسنده

مرحبا بك يالفريد اخو الفريد=لابتي بامثالكم متفرّده
لك تحيه مع هلا واليوم عيد=يوم جتني لك رساله مسنده
مرحبا بك جيّتَك فجرٍ جديد=والعلوم الطيبه متجدده
يوم جتنا نبذل الجهد الجهيد=وطيبنا من طيبكم مَدّة يده
والهدف دونه ملاعيب الجريد=ياعلي يادوبْ دوبْ احدده
المواقف تقهر الرجل العنيد=كان ماحصل يمينٍ تسنده
والوحيد بغربته مثل الشريد=وكل من هاجرْ يعوّد لبلده
والممارح تختلف علمٍ اكيد=كم اسودٍ للعرين معَوّده
هذا ردي والغلا ساع البريد=يم رفيقٍ واضحٍ في مقصده