يا عالمٍ بالكون دقه و جلِّه = باسمك بديت وعذت من كل سيّه
وعبرت عن ماكان صدري محلِّه = باهلاً وسهلاً واحترام وتحيَّه
للي خطابي واتصالي وصلِّه= واللا بشخصي جيت واجاب ليِّه
على هلا ياطيبين الجبلِّه = من قاصي العربان والا دنيَّه
يقول ابن عمهوج حياكم الله =على الشحم والطيب والشاذليَّه
وقتٍ جمعكم عندنا ما نملِّه= ومن ابرك الساعات مرت عليَّه
يا مرحبا عدة ليال الاهلِّه = من خلقت الدنيا للايام ذيَّه
تظفي عليكم مابه احد تزلِّه = ترعد سحايبها بيالله حيه
وتمطر بدهن العود وبلٍ تهلِّه =ينطح محيَّاكم بريحٍ زكيَّه
تستاهلون الطيب وانتم هللِّه= وانا اتشرف بالرجال الوفيَّه
جيَّتكم الليله خيار الادلِّه= تعطيك صوره للعلاقات حيَّه
الليله تسوى عندي العام كلِّه=الا رمضان ونص شهر الضحيَّه
ليله فرح من كان ظلي يظلِّه= واليوم ليَّه عن شقا الوقت فيَّه
ونجومها ماهم نجوم المجلَّه=نجومها انتم يا حمات الونيَّه
شيوخ ورجالٍ كماحد سلَّه = كلٍ يسابق بالمراجل خويه
نعم الرجال انتم قبيله وملَّه =السلم راقي والعقيدة نقيَّه
يفخر من أنتم لابةٍ عزوتلِّه = ما خص ناس , اقول سبع اللفيَّه
ومسك الختام اقول حياكم الله = وصلوا على المعصوم خير البريَّه

يا مرحبا بسمي وبسم ابن عمهوج = نافل ولد ناهي بعيد المدالي
مكارمه جزلات ويديه نجوج = شيخ ٍ يعرفونه شيوخ الرجالي
تيما الشمال اللي بها عد هدوج = ونافل بحرب من العدود الطوالي
عد زلالي خير اساميه بهروج = ما ينورد بقصيرات الحبالي
والا الردي جعله على الارض ما يدوج =من الجنوب أليا حدود الشمالي
لعل ابو ناهي مدى العمر مبهوج= مثل البدر في مظلمات الليالي
يوم الزمان اللي على خيل وسروج = جدوده اللي يحتمون التوالي
شيوخ ربع ٍ بالوغا فوجهم فوج=عزوة ذوي عون الدهايا الجمالي
من ربعي المزنان عدَّالة العوج=وسَّامة العرقاه في كل حالي
والطيب جوٍّ به مدارات وبروج= يطمح له الطيب وهو فوق عالي
من لابلغت فيه المعاريف هلبوج = ومعروف ابن عمهوج حيٍّ أبَّالي
راعي هلا للضيف والباب مهجوج= قوله يعقله بالفعايل عقالي
دام السماء مرفوع وطيوره تروج = يملكني الطيب ويملك عيالي