يامل قلب عذب الصدر تعذيب=من كثرة الهاجوس والهم دابه
يفره الهاجوس فر الــدواليب=وإن فك قفل القلب يجيك مابه
البارحة جتني خطوط ومكاتيب=وساعة قرينا الخط قلنا هلابه
يامرحبا وأهلين ونزيد ترحيب=عداد ما هل المطر من سحابه
وعداد رمل النفد لو عد ياديب=وألذ وأحلى من روايع سحابه
جواب من هو رتب القول ترتيب=الشاعر اللي ما ينقد جوابه
يالشيخ يالممدوح يا منقع الطيب=يازايد بالطيب عن من هقابه
مفراص ماص اللي تفك اللواليب=صعب حليم لك مقام ومهابه
قولك صحيح ودايم قولك يصيب=ربعي على حظ المراجل ذيابه
اللي يفكون الحسب بالمواجيب=وكلن يجازونه على ما بدابه
أولاد راشد مرذية شمخ النيب=كم واحد بصباه غفو شبابه
تشهدلهم أفعولهم والأجانيب=ربعي خزام الليث لا كش نابه
بقيادة الحماد حصن الأطاليب=اللي نواهم بالردى وعذابه
فعلن تعرفه كل سمو الأعاريب=اليا حل بأطراف الجهامه ضبابه
وببيوتهم تلقى سوات القصاصيب=هيف السمين وعز منهو لجى به
واليوم آمان بظل حكم المعازيب=والطيب اللي ما شكوه القرابه
والدين والدنيا حظوظ ومواهيب=ومن يحرم التوفيق يفقد صوابه
وصلاة ربي عد مادرهم الذيب=وعداد رمل أحزومها مع ترابه
على النبي الهاشمي والأصاحيب=أزكى صلاتن والسلام لجنابه