سو يافكري جزيل القول سوه=لاتجيب إلا الأباكير الجلايل
من غزيرٍ يجرح الوديان نوه=لانهمر من دافعه شال المسايل
بيّض الله وجه رجّال الحموه=عد ما تمطر هماليل المخايل
الثنا يستاهله راع المروه=اقصد ابن هذيل كسّاب الجمايل
قال قولٍ عزّني لافض فوه=وانتصرت بفعل مشهور السلايل
العلوم الغانمه عنده ضروه=مايجيب ابو فهد غير الاوايل
دايم لفزعة رفيقه به جروه=يرتكي زومان شيّال الثقايل
شد حبل المرجله ماهوب توه=واتخذها له دليل وله وسايل
اتخذها عشقةٍ له من نشوه=جادلٍ عشاقها دايم قلايل
طير شلوى للقرايب والمخوه=وبالدروب الكايده يابس بلايل
اشهد انه بالمراجل شب ضوه=حي والله من حجاج ومن فعايل
ياسعد لاهنت يا عز الدنوه=يا نجاة اللي عليه الوقت مايل
ياسليل الجود يا شذرة علوه=المدايح غير شرواكم هزايل
كثّر المولى صفاتك بالسموه=يا سليل المجد ياواف الخصايل
ما نقول النصب والقول المموه=يوم اقول القول قولي له دلايل
وجارك الله من بلا الدنيا وسوه=ومن عذاب الاخره يوم الهوايل

صــــــــح السان الشاعر ابو ناصر
ولاهي غريبه الدره الثمينه من حمود الى سعد هذيل
شعراء مبدعين
كل الشكر لك أخي ابو يارا علىمتابعة كل جديد لهذا الشاعر حمود
يستاهل كل خير
تقبل مروري وشكري لك