الليلةالدنيـا تـقـل عـيـن ذرة للشاعر/مصلح المحمدي

الليلة الدنيـا تـقـل عـيـن ذرة=عوراء وتكسر عينها من عورهـا
أسباب هما وسـط قلبـي مقـرّة=جرعنّي أوصـاب الحياة وقشرهـا
يفوح من بيـن المحاديـب حـرّه=وعمس عيوني لين غيّب نظرهـا
خامس سنة والحـرب كرة وكـرة=لاما أعتلى فوق الضلوع وهصرها
وأنا رجل ماتكشف النـاس سـرّه=لاشفت بعض الناس تنكث صررها
أضحك وأبيـن للعـواذل مسـرّة=ولغة عيونـي ما تبيـن خبـرهـا
همي وسـري داخلـي مستقـرّه=وأنفي سوالف كان غيري نشرها
شكواي للي مااختفت عنـه غـرّه=اللي خلق خلقه بشتـى صورهـا
وماسحب خطا رجلي ورى كل جرّة=يوم العرب تدفن جررهـا جررهـا
أشد عينـي فـوق درب المجـرّة=واطلب من الله خطوتي ما يعثرهـا
والآدامي لويبخـن اللـي يضـرّه=رجليه عن بعض المشاحي قصرها
ميـر الأمـل خـداع والعمر مـرّة=وماكل من هـام المعالـي قدرهـا
ورى الأمل نجري بحلـوة ومـرّة=وآجالنا فـي علـم ربـي قدرهـا
وأخذت لي فـي ساحة القـاف فـرّه=وأحـس نفسـي زال عنها كدرهـا

الشاعر/ مصلح بن براك المحمدي