(..**.. فدا راسك ..**..) لإبن بتلاء

قصيدة للشاعر سلطان بن بتلاء في والدته شفاها الله

ليت (الهشاشـه) فـي عظامـي ولافيـك=أو ليتهـم يرضـون.. وانقـل عظامـي
ياليتهـم يـرضـون..والله لااعطـيـك=لااعطيـك منهـا ماانحنـى واستقـامـي
اليـن ترجـع مثلـهـا اول خطـاويـك=وتعـود هيـئـة جلسـتـك والمقـامـي
مادامـنـي يالغالـيـه مـنـك والـيـك=ممنون لـك فـي حملـي وفـي فطامـي
ابقـى فـدا راسـك وفـدوة مواطـيـك=ماهـو تـفـدّاي الـغـزل والغـرامـي
يااطهر من الانهار واصدق مـن الشيـك=شيـك الثقـه ماهـو بشيـك الحرامـي
ابــوي مابـيـن الصبـايـا منقـيـك=ولاهي برميه جـات مـن غيـر رامـي
اخـذك مـن شيـخ ٍ بطيبـه مربـيـك=وجبتـي منـه ستـة حـرار ٍ كـرامـي
رجـل ٍ نجـح واللـي يدلّـك وينبـيـك=دايم ..(مره خلف اي رجـل ٍ عصامـي)
يااعطف بشر.. وانقى بشر .. في مباديك"=لـو امدحـك ماهـو مكـفّـي كـلامـي
كم ضقت مـن دنيـا البهاذيـل واجيـك=واروح .. والدنـيـا اقــلّ اهتمـامـي
بطفولتي ..في لعبـي ازعجـك واشقيـك=واليـوم اهمّـك لــو أروح لـدوامـي
جنـه براحـة كفـك.. وتحـت رجليـك=جنـة خلـود تفيـض.. بـرد وسلامـي
الله هـو الـلـي يالعـزيـزه معلـيّـك=جعـل رضـاك اهـم مــن هالانـامـي
عسى الولي يااغلـى المخاليـق يشفيـك=وياليتهـم يرضـون .. وانقـل عظامـي