يالله تبيح سعود وتحلل سعود :: الشاعر مبارك بن ناصر بن حديد

قصيدة رثاء من الشاعر مبارك بن حديد بالمغفور له ان شاء الله فقيد الجميع
سعود بن محمد بن حديد الفريدي

(( يالله تبيح سعود وتحلل سعود ))

فقدنا في ليلة الاربعاء الموافق 20 / 2 / 1437 هـ
ببالغ الحزن والاسى وبقلوبٍ مؤمنه بقضاء الله وقدره
فقدناء رجلٍ مكانه في القلوب كبير وفقدانه خطب جلل
وفراقه كسرٍ سيبقى في قلوب محبيه وقتٍ طويل
ولا نقول الا مايرضي الله (إنا لله وإنا إليه راجعون) اسكنه الله فسيح جناته
وتغمده بواسع رحمته

ليلة ربوع ويومها كلها سود=ليلة حزن ليلة فجيعه شديده
قبل العشاء معيه على الخط ماجود=وبالعاشره جانا العزاء به وكيده
يالله تبيح سعود وتحلل سعود=انا اشهد انا فاقدينٍ وليده
فجيعةٍ حلت بناء حزن ولهود=بأحزانها نبقاء سنينٍ مديده
فقيدنا ماهو مثل كل مفقود=فقيدةٍ ياكبرها من فقيده
فرقٍ بها زلزال بركان ورعود=هزة جميع اركان كل البديده
خطبٍ جلل حطم بنا متون وعضود=ياكبر فقدان العضيد لعضيده
عضدٍ بميقافه لنا كنه الطود=عنيد قاسي للوجيه العنيده
ماهو من اللي ماقفه دامها سهود=يصيد خصمه قبل خصمه يصيده
امنزهن عن كل ماقيل منقود=والكامل الله والقصور بعبيده
بالعرف والحكمه له امجاد وشهود=به حكمة العارف ورؤياء سديده
وبين القرابه واهل الطيب معدود=وبه خمس ميزاتٍ جمعهن فريده
عقل وثقل وإدراك وسلوب وسدود=ومدات يمنى سعود ماهي زهيده
بالطيب له قومه بها يعشق الزود=يعشق بها فعل الجميل ويزيده
ويالله ياجابر عزى كل مضهود= تجبر عزانا بالعزيز الفقيده
وياخير من يطلب وياخير معبود=بعفوك ومقدرتك تثقل رصيده
ويالله تبيح سعود وتحلل سعود=آمين ياقادر على ماتريده
وختامها اعداد ماهبت النود=على الشفيع ازكى صلاة بعقيده

الشاعر الكبير
مبارك بن ناصر بن حديد الفريدي

اللهم اغفرلة وارحمة وتجاوز عن سيئاتة واجعلة في جنات النعيم
اللهم ابدله دارا خيرا من داره واهلا خيرا من اهلة واجعل قبره روضة من رياض الجنة
اللهم اربط على قلوب اهله وذويه ومحبيه وارزقهم الصبر وحسن العزاء امين .