قصيده اجتماعيه

قصيدتي التاليه تُعبّر عن نفسها.

ليت المعنّى حامي الوجد يكفيه
والا الدموع اللي نثرها تسدّه
ليت البيوت اللي نظمها تسلّيه
ليته من الهاجوس يرتاح مدّه
ليت الوفا يبقى مع الناس طاريه
ليت الحذر دون المقدّر يردّه
ليت الحيا بوجيه الاجواد يوحيه
خطو الغشيم اللي رخيصن مردّه
ياصاح وقتك لاتغرّك لياليه
مثل البحر مابين جزره ومدّه
اختر من الأصحاب شهمٍ تخاويه
واحذر من اللي للمشاكل يودّه
واحذر سفيه الراي واللي مراكيه
اللي حنوكه للقفا مستعدّه
يقول غير اللي ورى القلب يخفيه
يعطيك مع يمناه خشمه وخدّه
مثله ترى لو كل ليله تعشّيه
فعلك مع اهل المعرفه مايعدّه
وترى الشريطي مايوفّر بناخيه
ياقف مع اشريطيّة السوق ضده
لو جبت له زين المواتر زهد فيه
يقول هذي سومتي وانت حدّه