اهداء من الشاعر مقبل بن نمران الى صقر المملكه صالح رويضان الفريدي

إهداء إلى صقر المملكة وصقر حرب
رئيس الرقباء المظلي / صالح بن رويضان الفريدي الحربي

تريحوا يامدورين المنصات=تبقی منصات المكارم لأهلها
أشغلتوا العالم بكثر التفاهات=وأعماركم تكبر ويكبر جهلها
والزومه اللي مالها أصل واثبات=زومة فلس من جالها ومن قبلها
يستاهل البيضاء وجزل العبارات=راع العلوم النايفات وبطلها
راعي هلا راع الصخاء والجزيلات=ريف القلوب الصافيات وعسلها
مجالسه فوق الهضاب الطويلات=شامخ عن حدود الطمان وسلها
بيت لمن حوله وصوف ودلالات=توصف به العربان موقع فللها
صقر الوطن رمز الوفاء والطموحات=موسوعة علوم المراجل دخلها
هوايته ماهيب مثل الهوايات=من طنخة الراس المحنك وصلها
يرقی علی حدود الفلك والمجرات=ورسالته من طيب ذاته حملها
معه العلم فوق السحب بالولايات=توحيد مع تقدير داره واهلها
مع صورة مؤسس بلاد البطولات=تسطير مجد وجود روحه بذلها
ورفع صور ملوكنا بالامارات=خنجر علی كبد العداه ودجلها
رسالة الشعب الوفي والتحيات=ابو فهد من طيب رأسه نقلها
وتناقلت كل الصحف والمحطات=وسكر علی عقول الخوارج جدلها
حر عليه من الحرار العلامات=أو الحرار وصوف رأسه شملها
وبهوايته نال الفخر والشهادات=في مستوی العالم بذكره دهلها
اسم الفريدي سطره بالسماوات=ونفسه لساحات المكارم جعلها
صالح رويضان الوفاء والمهمات=صالح رويضان الفعول وجملها
صالح رويضان النقاء والمروات=صالح رويضان السلوم وجبلها
صالح رويضان العلوم المنيفات=الطيبه لو تنعقل له عقلها
يستاهل التمجيد مره ومرات=مافيه كلمه قلتها الا فعلها

الشاعر
مقبل بن علي بن نمران الفريدي الحربي