قصيدة الشاعر مقبل النمران في حفل استقبال أبناء الشملان

بسم الله الرحمن الرحيم

في مساء الاربعاء الجميل ، احتفلت عائلة الشملان بقدوم أبنائهم المبتعثين خارج المملكة وتحديداً من ( كندا ) بعد أن أمضوا عام كامل هناك لدراسة مرحلة البكالوريوس

( فهد بن حمد الشملان - مخلد بن عبدالرحمن الشملان )

وقد أبى الشعر إلا الحضور بهذه المناسبة فقد كان للشاعر/ مقبل النمران
حضور مميز بقصيدة مميزة نالت استحسان جميع الحضور بمعانيها الجميلة بالسرد الجميل من مكان اقامة ابناء العم ( فهد و مخلد ) نوفا سكوشا وحتى بلادنا السعودية حفظها الله

نترككم مع القصيدة:

غرد سماك من الفرح عذب الألوان=يافلسفة روح القصيد ومعانيه
وأمطر هلا في وابل الحرف هتان=من صادق إحساس الشعور وقوافيه
واكتب هلا في كل شارع وميدان=للي طموحه للمراجل مخاويه
طموح واحد وأنتم اثنين واخوان=كلن يحقق شوق نفسه وداعيه
في ديرة الغربه نوادر وفرسان=منهالكم بالعلم نبعه وصافيه
وبقدومكم تزهر مساحات وأوطان=وينبض لكم من واهج الشوق حاليه
وفيكم هلا وافي على كل ماكان=من رحلة العلم الطويل ولياليه
فهد ومخلد والهلا سر وإعلان=من نوفا سكوشا لين حيك وغاليه
والفرصه اللي بأول العمر عنوان=للي يبي فخره ومجده بتاليه
واللي بناله حلم للمجد عطشان=ماينثني عزمه ولو طال ساريه
يصبر ويبذل جهده بكل الأحيان=والله على عزمه يكلل مساعيه
وفي علم تكوين الخلائق والانسان=اللي قوي بشيء يفرض مباديه
والعلم قوة موقف وفكر ولسان=ومركز وجاه يعز بالوقت راعيه
واللي رحل للعلم وافي وكسبان=لو العرب ساقت جيوش المشاريه
والموقف اللي راسخ بكل الأذهان=لحظة قدوم الشبل لديار أهاليه
يبقى لكم نبراس في كل الأزمان=تسترجعه وتمد عزمك هقاويه
ماهيب ضمة أب للابن ولهان=ضمك وضم أحلامه وضم أمانيه
شعور لايمكن يقدر بالأثمان=بغير الابوه مابه أحدٍ يجاريه
وتاريخكم مبدأ ونخوه وعرفان=وكلن يقوده طيب فعله وماضيه
ويافهد اسمع قول خالك ولاهان=مخلد وأنا قولي من الزيف حاميه
من جد ابوك اللي على الطيب شملان=لليوم وأحفاده يحفظون طاريه
بنالهم مخلد على الجود ديوان=عساه بالفردوس في ظل واليه
وافين من رؤس المكارم والأعيان=تاريخهم يشهد غريمه وراويه
غرد لك الشعر المقفى والأوزان=يطرب له إحساسك وسمعك وقاريه
عقبال رجعتكم على خير برهان=ونيل الطموح اللي تشرف هقاويه

وهذه صور من الاحتفال:

من يمين الصورة
( فهد بن حمد الشملان - الشاعر/ مقبل النمران - مخلد بن عبدالرحمن الشملان )

صح لسان الشاعر مقبل بن نمران
وفى وكفى قصيده جزله صح لسانه مليون
ماشاء الله تبارك الله
يستاهلون الاحتفال والقصيد
اسأل الله لهم التوفيق

اخوي الشاعر
مقبل بن علي بن نمران
صح لسانك شاعر جزل قلت ووفيت
والشباب فهد بن حمد ومخلد بن عبدالرحمن بستاهلون
الاحتفال وفقهم الله لمايحب ويرضى
تحيتي

الف مبروك لشملان وبالتوفيق


وصح لسان الشاعر مقبل بن نمران


وشكرا ابوعمر على الاضافه

صح لسان الشاعر القدير ابو ياسر

ولاهنت يابن شملان على نقل الجزل

وتمنياتنا لهم بالتوفيق والسداد

تحيتي وتقديري للجميع

ماشاء الله

وصح لسان ابو ياسر

ونتمنى لهم التوفيق في دراستهم

وشكرا لك اخي عبدالعزيز

صح لسان أبو ياسر على هذه الرائعة ، ومعانيها الجميلة ، وتفاعلها الجيد مع الحدث

استمتعنا تلك الليلة باستقبال اخواننا ( فهد و مخلد ) وامتعنا العزيز/ مقبل النمران (بتلك الدرر)

جزيل الشكر والتقدير لك أبو عمر على هذا النقل الرائع ..

وفـــي عــلــم تـكـويــن الـخـلائــق والانــســان=الـــلـــي قــــــوي بـــشـــيء يـــفـــرض مــبــاديـــه
والــعــلــم قــــــوة مـــوقـــف وفـــكــــر ولـــســــان=ومــركـــز وجــــــاه يـــعـــز بــالــوقــت راعـــيـــه

المصدر : قصيدة الشاعر مقبل النمران في حفل استقبال أبناء الشملان

صح لسانك ملايين يامقبل
قصيدك يطربني شي من الله
على كثر ماني معجب بمفرداتك الفذه وفكرك الجزل الا اني اللومك على التواجد بيننا

والنعم بال شملان كلهم ربعنا وطيبهم من طيبنا نسأل الله العزيز القدير ان يوفق الشابين مخلد وفهد
في حياتهم العلميه والعمليه ونتمنى لهم التوفيق والسداد
كما نشكرك اخي عبد العزيز على الاضافه المشرفه دمت بحفظ الباري