حثلين !!!!

بسم الله الرحمن الرحيم
قبل اسابيع فقدت قبيلة الفرده خاصة وحرب عامه علم من اعلامها ...
علم لمع نجمه في الكويت وفي السعوديه وضل مضيئاً حتى وفاته ...
كان نبراساً تفخر بامجاده القبيله ونرفع رؤوسنا بذكره ومكارم اخلاقه وكبير كرمه ..
انه والدنا ومعلمنا وكبيرنا الشيخ / حثلين بن هديب سليل المجد والفخر ومصدر الاعتزاز ..
ولما كان مصابنا فيه جلل كنت خلال الايام الماضيه صامتا من هول الصدمة واليوم اهدي للجميع
هذه الابيات المتواضعه التي لاترقى الى مستوى مشاعري نحوه يرحمه الله ولكنها عبرات حرى
لم استطع كتمها ...
وقد اسندتها الى اخي وصديقي فهد الحثلين (ابو مشاري)ولا يهونون اخوانه وربعه ...

ماينفع المفجوع كثر العباري=لو هلهن في كل يومٍ وليله
عصتني الابيات يابو مشاري=القلب ذايب والجوارح عليله
الله يجبر كسركم يالحراري=ويحسن عزاكم يوم غاب الدليله
الشيخ ابو ماجد ليا حل طاري=حثلين الاول قيل هذا سليله
من لابةٍ عند الملاقا مذاري=العزوه اللي من نطحها ياويله
عوق الخصيم ودايسين الخطاري=ربعي هل البلها حماة الدبيله
مرحوم ياشيخٍ على الطيب ضاري=وراع اليمين اللي تمد الجزيله
الطيب في دمه كما النيل جاري=ميراث جدانه وغاية حصيله
بين الجماعه مثل نجم المساري=وعند الاجانب كاسبٍ للنفيله
بسوق الرجوله كان بايع وشاري=والمدح دايم مكسبه من عميله
له بالحماده منزلة واعتباري=والبيت فيها فوق راس الطويله
به مجلسٍ كله شموخ ووقاري=ومدهال شيخان العرب والقبيله
وسوالفٍ حلوات ماهي هذاري=وعلومٍ تسليك لو هي قليله
والا الكرم كلٍّ عن الشيخ داري=مثل الخليل اللي ملازم خليله
راع الصيان العاليات الكباري=اللي بهن من ثقل الاحمال ميله
من فوقهن مثل ارتفاع الصواري=ومن تحتهن مثل اختلاط الخميله
الله يجعل له بدار القراري=اعلى مكانٍ مع شفاعة خليله
وفي جنة الفرودس بين الجواري=تحت الثمار اليانعات الظليله

رحم الله ابو فهد
حثلين بن هديب رحمة واسعه وأسكنه فسيح جناته
وصح لسانك ابو عبدالعزيز على هالمرثيه النابعه من القلب
نعم وفاة حثلين مصاب جلل رحمه الله
تحيتي

رحم الله الشيخ
حثلين بن هديب واسكنه فسيح جناته
مرثيه وافيه من شخص وافي دائماً في كل المواقف
سلمت ودمت وصح لسانك مليون يابو عبدالعزيز لاهنت ياغالي

الله يرحم ابوماجد رحمة واسعه ويجعل قبره روضه من رياض الجنه

ابوعبدالعزيز صح لسانك على هالدرر برجل يزهاها

وانت معروف عنك الوفاء والحميه لربعك وهذا ليس

مستغرب منك فأنت ولد محمد وجدك عتاق وعظم العرب

بيض الله وجهك على الحميه والتفاعل

تقبل مني أزكي التحايا

ابوعبدالعزيز صح لسانك على هذه القصيده التي عبرت عن مناقب و صفات هذا العلم الذي فقدته القبيله

رحمه الله و اسكنه جناته

رحم الله ابو فهد

وتغمده بوافر رحمته

وصح لسانك

وما هذه الابيات الاوفاء وطيبه

رحم الله الشيخ
حثلين بن هديب واسكنه فسيح جناته
قصيــــــــــــدة رثائية وجميلة بمعناها الذي تمتاز به ياشاعرنا الجزل
صح الله معانيك ورحم الله الشيخ حثلين
ولانستغرب منك الشعور
لأنه من وفاءك لاعدمناك

ايها الاوفياء
ماكانت الا مشاعر من الاعماق
كانت منكم واليكم
ومتواضعة كنا نعزي الروح فيها
رحم الله فقيدناوجعل قبره روضة
وصحت ابدانكم وشكر الله لكم هذه المشاعر والثقة
لاعدمتكم

رحم الله حثلين بن هديب وأسكنه فسيح جناته .. هو وجميع موتى المسلمين .

ودمت بهذا الوفاء أبوعبدالعزيز .. وأنت أهل للوفاء .

فتقبل مني وافر التحية والاحترام .

الله يرحمه رحمة واسعة ولا ييفتنا بعده

وصح لسانك الوالد الوافي أبو عبدالعزيز