يازيد لاتبحث خفايا بصندوق

يازيد لاتبحث خفايا بصندوق

يازيد لاتبــــــحث خفايا بصندوق
في وســـــط قلبي مـــن سنينٍ طويله


ما تدري أن صوتي من الحزن مخنوق
والهــــــــم في صدري ضلوعي تشيله



وما تدري أن خدي من الدمع محروق
وصاحبك طــــاحت جمرته في شليله



غنى مـــع القيفان طاروق طاروق
وهـــــــــــذي عوايد صاحبك كل ليله



ومدام تنشدني عن الحب والشوق
أنـــا شهيد الحب ما أدري قـــــتيله



الناس صارت بين عاشق ومعشوق
وانــــا الوحيد اللي مفــــارق خليله




خلي مـــكانه داخل القلب مرموق
ورثــــيت خلي وقت حزة رحيله




ما بيني وبينه مطـــاليب وحقوق
وكـــلٍ على ما قـــيل راح بسبيله



وانا من اللي فوق ثم فوق ثم فوق
ما اطرد ورى المقفي سوات الهبيله




وان طعتني يازيد لاتدخل السوق
عـــدو عيني سوق طيبه يجي له



(وجعل السحاب اللي معه رعد وبروق)
فـــي ديرتي يا زيد يــدرج مسيله



دارٍ سكن فيها من الناس غرنوق
راع العيون الناعـــسات الكحيله




مخلوق لكن غير عن كل مخلوق
بالزين يفرق عـــــن مزايين جيله




كامل وصوف وكامل الحسن والذوق
واموت مالقـــــــــــــى فالعذرى مثيله




من سبته قلبي له سنين مسروق
وما بيننا غير الرسايل وسيله

مما رآآق لي