بأمشي تعبت من الجلوس هنانه أستاذنك نفسيتي تعبانه

اخترت لكم...

بأمشي تعبت من الجلوس هنانه=أستأذنك نفسيتي تعبانه
بأخذ معي كوتي وقفازاتي=والمعطف اللي داكنات الوانه
وايضا قلم ناشف ودفتر بالي=اوراقه المتهالكه مليانه
قصايدٍ شبهتها مع نفسي=انسان تولد من حشاه انسانه
بأامشي على ذاك الرصيف الهادي=نوره هدوءه ياااالله بامكانه
من فوق رووس اشجاره المحتوته=يرسم على نفسه ضجيج اغصانه
حتى الغصون اوراقها لاطاحت=تعلقت في ظلًها ظميانه
اغصان يبسها الخريف وماتت =ويلفها ثلج الشتاء باأكفانه
بأمشي وجنح الليل ساكت يسمع=بوح الخطا حثه على كتمانه
في صوتها دقات قلب الماضي=والذكريات الشًيًقه سكانه
ارتاح يوم امشي هنا وافضفض=لاجواء ضرف الموقع وازمانه
واعرض عليه يشيل نص همومي=لومابحصل منه غيراذعانه
بأمشي وصدري مزدحم بضيوفه=زحمت مشاعر تقتحم وجدانه
الحب كوم ومثقل بما فيني=والشوق تحرق مهجتي نيرانه
بأمشي ولا متعبني الا احساسٍ=متساوياتٍ كفتي ميزانه
عيت ترجح معطيات القصه=باالقلب لاخوفه ولا اطمأنانه
بأمشي ولا في بالي الاحاجه=صورةعشيق ووردةٍ ذبلانه
العين تدي باالسهر واجبهم=والقلب يدي واجبه شريانه
بأمشي وانا مظلوم ياظالمني =مظلوم وسلاح الدعا بلسانه
وليا رفعت يدي...قلت بنفسي=الله يبيح عيونك (النعسانه)
بأمشي وانا دمعي تعدى عيني=ماهو مغير عيوني الغرقانه
اليا ذكرتك جبهتي وكفوفي=تبكي واقول لمن معي عرقانه
بأمشي وامانه قومي وناديني=لاتتركيني للأسى واخوانه
اللي ترين الكبرياء بقفايه=غيرك يشوفونه يعض اسنانه
قولي لي اوقف وقفيني واقف=وارضى من ادنى شي ياغلطانه
وان ماشقيتي بي شكيتك لله=بأمشي تعبت من الجلوس هنااانه

صح لسانك عبدالعزيز
تقبل وافر التقدير

هلا مليون ابو راشد
وتهدينا مجددا من قلب ((طيبة الطيبه)) هذه المشاعر الدافئه والعواطف الجياشه ...
فيها نحس بلواعج الوجد ملتحفة بروحانية المكان
عمق في المعاني وبذخ في الالفاظ وركوب على صهوة هذا البحر الصاخب !!!
تغيب طويلا ولكنك تعود على مراكب اللؤلؤ ....
صح لسانك وسلم بنانك
تحياتي وتقديري

صح لسانك عبدالعزيز
نرحب بك وبمشاركتك وننتظرمن مشاركات
دمت بصحه وعافيه
تحيتي لك

صح لسانك من القصايد القلايل التي اعدت قراتها

صح لسنك

شاعر لك بصمه خاصه ولكن على حلو هالقصيده يعيبها الشعر الخيالي


تسلم ع الأضافه وننتظر جديدك

من القصائد التي نعيش بها حياة أخرى ..

مشكور اخوي