أدعي عليهم والدعى

هذه القصيده أعجبتني وأحببت نشرها

الله مـن قلـب نهيتـه ولا طــاع =يلعب به الهاجوس لعـب المنازيـع
متحير بامره غـدى شملـه امـزاع= صبر جميل ويرجع القلـب ويطيـع
قفى تجره خاضبت روس الاصباع= ام الثمـان الضيـقـات اللوامـيـع
خلي من الخفرات ماهيـب مهبـاع= ولا هي من السرد الطوال النعانيـع
وقرونها من فوق الامتـان شـراع= كالعسب من فـوق الودايـا مهانيـع
بطن العسيف مجاذبت طول الابواع= ركابهـا دايـم يتـل المصـاريـع
ما شذبت بالزور طـراف الاكـواع= لا صكن العيرات تسبق على الريـع
لا شفت زوله يجني القلب مربـاع= لو ما حصل لي من قبالـه منافيـع
عيوابهـا عنـي قليليـن الاسنـاع= اسباب ساس البغض ماهم طماميـع
ادعي عليهم والدعا حـذف مقـلاع= ادعو معي عسى تصيـب المقاليـع
ارجي عساهم للبلاوى والأوجاع=من كل صادوفن يجيهم قواميع
الله يعرضهم من الروس الاشعـاع= ذريـة مـن محكمـات المصانيـع
دخانها مثل القبيسـي اليـا انثاع= تاخذ على طرافهـم بضـع اسابيـع
تلقـا الاوادم هاجميـن وخشاع= بس الجماجـم كالزبيـدي مصاليـع
والا عساهـم مزنـة نوهـا مـاع= هديمة ينـزل بردهـا صواميـع
هديمة ما ضاح بـه شـوف لمـاع= يسوقها الغربـي وشرقـي رواديـع
يسكر هواه ومزنها يضـرب القـاع= ترمي عليهم كبـر روس المرابيـع
يسج فيهـا القلـب منهـم ويرتـاع= منها تضيـع افكارهـم والمراميـع
يعذر بغالـي سلعتـه كـل طمـاع= وتذهل عن المرضع قلوب المراضيع
تأخذ ثلاث اسبوع والمـزن مامـاع= والسيل حايـر مـا لقالـه مطاليـع
واليا غدو مثل الطفل والنسم ضـاع= يفتـح لهـم بالقـاع درب وبواليـع
هفت غريق الموج من غير مرجاع =من فوقهم سبع الاراضي شواميـع
يضرب بهم وصف على كل الانواع= وتنشر بهم كل المحطـات وتذيـع

الشاعر خالد بن عقاب الكسر المرشدي العتيبي

لاهنت اخي ابو فيصل
مشكوووووور والله يعطيك الف عافيه

وقرونها من فوق الامتان شراع
ياعليكم يالبدو تشبيه غريب الحين هي عنز بالله يوم قال لها قرونها
واذكر لكم دعابه مره كنا بزواج وجنبي عجوز طبعا بدويه اناهين مار البلاء صديقاتي حضريات وجنبي وعاد العجوز من التحمس لزين شافة وحده قالت ياطول راسها طبعن حضريات مايفهمن بعض كلام البدو وانا مسويه برستنج قالت وحده بسم الله قلت وش بيك قالت العجوز تقول ياطول راس البنت طبعن انا داريه ان هالعجوز تقصد شعر البنت تحسب ام راس طويل معاقه مادرت انها تقصد شعرها
قلت يابنت الناس ترى تقصد شعرها قالت خاله فر الله راسك على هالكلمه
لا وش قال قال قرونها لاوالله مدحة
طولة بس موقف بجد ضحكة منه وتفشلت منه بس الحمدلله اني بدويه

أخي غازي بن عجاب
قصيدة رائعة ولا يُلام إعجابك بها
جامعة
شوق وشقى //دعوة ودعاء
آماني وتمني // بلاوي وصواديف
قوية جدا
تسلم أيادي للنقل أقوى

خالد الكسر شاعر بس دعائه أقشر

على مادري أقول صح لسانه أو الله يرحمه

ابوفيصل مساك ورد وأنتبه

لاتاكل علاج بدون وصفه تصير مثل

اللي رد قبلي تقبل مروري

صح لسان شاعرها
وسلم ناقلها
لاهنت ابو فيصل
على ايرادها

يعطيك العافيه

على القصيدة

هذا القصيد والابلاش ,,,,,, مفردات وقوة ابيات ووزن وقافيه جميله
صح لسان شاعرها وسلم بنااان ناااشرها .........

الله يعطيك العافية على الاختيار الجزل
بل سيعجب الجميع لانه من نقل وختيار شاعرنا
ابو فيصل
تقبل مروري وتقديري ستمتعنا بقوة القصيدة

اقتباس:
المشاركة الأصلية كتبت بواسطة النمر الارقط
لاهنت اخي ابو فيصل
مشكوووووور والله يعطيك الف عافيه

اخوى
النمر الارقط
وانت ماتهون ويعطيك العافيه ومشكور
على المرور العطر
تحيتي