اختار سمحـات الـدروب النظيفـه

اختار سمحـات الـدروب النظيفـه=اللي غسلها رايـح المـزن برشـاش
يمشونهـا قـوم النفـوس الشريـف=اللي ضمايرهم نقيـة كمـا الشـاش
ابيوتهـم مثـل الحصـون المنيفـة=ما هي لطير البوم غيران واعشـاش
وحلالهـم للضيـف دايـم مريـفـه=لو رجلهم يسرح ويضوي على مـاش
والرجل منهـم مـا يخلـي رديفـه=إن ما ت مثله مات وان عاش له عاش
وان مات منهم رجـل عقـب خليفـه=يطعن نحور القـوم ويـرد الادبـاش
يعرف هدف روحه ويعـرف وليفـه=ما يعرف الخونـة ولا هـو بغشـاش
وليـا رزقـه الله بعـذراء عفيـفـة=ايحطها مـا بيـن نونـه والارمـاش
ماهو على الخفـرات يستـل سيفـه=وان طالعوا فيـه الرياجيـل ينحـاش
حلـو النبـا سمـح المحيـا لضيفـه=ويصير له خـادم مسخـر وفـراش
وان مد مـا مـدت يمينـه قصيفـة=مدت يمينه تبهـر الخبـل والـلاش
واليا هـرج تلقـى علومـه طريفـة=ما هـو لهفـوات المناعيـر منقـاش
وان شبت النيـران مـا هـو بليفـة=في ساعة الكربـة سـواي ورشـاش
سده بعيد ولا أحـد يعـرف غريفـه=ولا هو لعرض المكرم العرض نهاش
والشوك في جنبـه سـوات القطيفـه=إن كان ما له بيت مامـون وافـراش
ما يرتكي فـوق الخبـول الضعيفـة=اللـي ليـا حركتهـا قدرهـا طـاش
وان جـا نهـار كـل قـرم يعيفـه=ما هو ليا ثارت على القـوم رمـاش
الكذب يعرف بيـن الأجـواد زيفـه=والصدق مثل السيف صاطي وحشاش
وصحيفتة يـا طيبهـا مـن صحيفـة=ولهـا مـن العقـال كاتـب ونقـاش
حـاز المراجـل والمراجـل كليفـة=الا على اللي كل مـا رامهـا هـاش
وان شاف له من جانب القـوم خيفـة=تلقـاه للخيفـة مهـاجـم وبـطـاش
الصدق والمعروف والطيـب كيفـه=ويغبش لها مع طلعة الفجـر مغبـاش
للحمل مـا تلقـى جنوبـه صخيفـة=حوله بروق تعمـي العيـن وافـلاش
يصبر على جرحـه ويمسـح نزيفـه=طبه بشبه خير من طـب الاحبـاش
ولا هو كما سبـع سنونـه ضعيفـة=دايـم يلحسهـا وللعظـم عــراش
وان شاف له في غيبة النـاس شيفـة=ما هو بخبل لاخضر العـود قـراش
دنياه لـن صـارت ذلـول عسيفـة=طوع علهيـا كـل عاصـي ونفـاش
وان كان قفـت مـا عليهـا حسيفـة=ولا هو ورا هوج المعاصير قشـاش
وان جاع ما وقع كمـا طيـر جيفـة=وان عري ما يلبس سماليل وأخيـاش

الشاعر:مطلق الثبيتي ( رحمة الله علية )