الضعف

هـذا الخـطا اللي ما توقعت يخطيه
شف كيف كشـّر طيّـب القلب نابه
أثر الحسد لاعشعش بصدر راعيه
يجعل من قلوب الحبايب ذيابه
اللي تعلم من سكوتي تماديه
علمني استقبل خطاه برحابه
والواجب انه لو جحد فزعتي فيه
ما يجحد حقوق النسب والقرابه
وانا اللي يوم المصايب تبكيه
كنت أقرب إله بضيقته من ثيابه
اللي تعاف اوله ينعاف تاليه
وانا كفى صدري من الغيض مابه
من لا وقف لي وقفة رجال ما ابيه
يغني عن حضور المقفي غيابه
من لا فزع بالكايده مع بني اخيه
وقت الرخا ما يحسب احساب لابه
علمت غيري كيف لا صد ما اجيه
وانا تعلمت الصبر والصلابه
لان الشجاع ان ما لقى من يواسيه
إن ما نشدته ما علمت بمصابه
ما دام بعدي عن رفيقي بيرضيه
نذر علي اني فلا اطق بابه
عيب التفت في جاه مخلوق وادعيه
وللمبتلي ساعة دعا مستجابه
الضعف ما اطيقه ولا اطيق طاريه
والدمع لا يرقى وينرقابه
والحلم يغنيني عن الكبر والتيه
والظلم محصيني كآبه كآبه
إن ما جمعت وجيه ما افرق وجيه
ومن لا بنيته ما سعيت بخرابه
وانا لو اني ابلتفت التفت ليه
الرمح غالي والفريسه ذبابه !!
بدري علي احسب له احساب واجيه
وبدري عليه يشيلني من حسابه
كاني عتقته بأعتقه رأفة فيه
الا الطلابه ما خشيت الطلابه
ماهب علشانه عشان المشاريه
سامحت طيشه وابتليت بعذابه
اليا كسر بخاطرك شخص تغليه
حتى المعاتب تستحي من عتابه
اللي سكن صدري من الغيظ يكفيه
مل تفاصيلي سكوت ورتابه
اللي بيدخل في مزاجي بأسويه
وبأخاطب الفض الفليض بخطابه
مثل الغلا اللي باخذه منه بعطيه
ويسمع جوابي بسمع جوابه
دام احترامي للقرابه مجريه
يا شيخ ملعون امها من قرابه !!
لو كل شخض بيحتقر في بأخاويه
ما كان حزت من المراجل مهابه
ياهيه مثلي ما يقولون له هيــــه !!
مدري متى تتعلمون الذرابه ؟ ؟
اللي معلمك الكتابه على ايديه
لمحت بصر ويبعثرك من كتابه
ومثلي اليا من قلت لك قول يوفيه
والقرم لامنـه وكــّد العلم جابه !!
سمه تحدي سمه اللي تسميه
بس الوكاد انه ماهوب استجابه
اللي ماهوب قد المواجه يخليه
ومن لا قدرت تهيــّبه منك ... هـــابه !!
الله يعز وجيه ويطمن وجيــه
وحنا بشــر ...!! لكــن بــشر بــوسط غابه !!!
ومن لافزع بالكايده مع بني اخيه
وقت الرخا ما يحسب احساب لابه ............



اعجبتني ونقلتها لكم ولااعرف شاعرها