من عاش بالدنيا يشوف العجايب أحمد الناصر

السلام عليكم ورحمة الله وبركاته
أسعد الله اوقاتكم بكل خير .. قصيده للشاعر الكبير / احمد الناصر الشايع
اتمنى ان تستمتعوا بقراءتها

كل من عاش بالدنيا يشـوف العجايـب= مثل ماشفـت بالدنيـا وشفتـه باهلهـا
قمت ابرق وافرق بين مخطـي وصايـب= مثل فرق الجبال النايفـه مـن سهلهـا
والتوافيق عنـد الله حظـوظ و وهايـب =عند رب يجـازي كـل نفـس بعملهـا
اشهـد ان الهـدوم يستـرن المعايـب =اثرها تستـر الحرمـه وتستـر فحلهـا
الاوادم بعضهم مثـل وصـف الجلايـب= لو توحّد بها ذيـب الخـلا كـان اكلهـا
كم صبيٍ تحسب انه عطيـب الضرايـب =وان بخصته , كرهت الديره اللي نزلهـا
مايسر ان حضر , وان غاب ماقيل غايب= مـار الارزاق عنـد الله لخلقـه كفلهـا
مايضـد الضديـد ولايفـيـد القـرايـب= يوم نفسه تعـدى حدهـا مـن زعلهـا
وفيه رجل يحـل المشكلـه والنشايـب= كـل ماحملـوه الواجبـات احتملـهـا
واقـفٍ للـزوم ومرتـكـي للنـوايـب= والحمـول الثقيلـه مالهـا الا جملهـا
ليت روحه قبل تركـز عليـه النصايـب= حط عنه اربعين مـن الزلايـب بدلهـا
وفيه منهو مسالـم مايحـب الطلايـب =ما اشتقى من رضى نفسه ولا من زعلها
وفيه منهو اذا كبرت عليـك المصايـب =ساق وجهه وجاهه لك ونفسـه بذلهـا
وفيه منهو يبا الجـودا فلاشـك هايـب =كل ماناض صدره جـى عضـوده خللها
وفيه منهو يحـل المعجـزات الصعايـب= اصغر افعاله الجـزلات محـدن فعلهـا
وفيه منهو يعيش وعيشتـه بالسبايـب= كل ماسمع غلطة مـن رفيقـه نقلهـا
وفيه منهو على نفسه رضى بالغلايـب= الله اللي رفـع نفـس ونفـس خذلهـا
لـو تبـي تنصحـه لله مجـر الهبايـب= انكـرك والنصيحـه ردهـا ماقبلـهـا
اشهد انه عقوبـه مـن كبـار العقايـب= قاصر المعرفه قلبـه كمـا قلـب بلهـا