قصائد فكاهية ضاحكة

بسم الله الرحمن الرحيم




السلام عليكم ورحمة الله وبركاته

هذه مختارات من طرائف الشعر النبطي ارجو انها تنال جزء من اعجابكم




وابدأ بالشاعر الكبير ضيدان عندما زار صديقه سعد فتأخر عليه في تقديم القهوه والقدوع فقال

جاك المسير مالقى منك ترحيب=لاجبتله قهوه ولامن قدوعي
ياليتني دورت غيرك معازيب=جيتك جويع ورحت منّك بجوعي
الظاهر انك ماتعرف المواجيب=لاشك طبعك يختلف عن طبوعي
حنّا لاجانا الضيف ننفض له الجيب=ونجيبله من كل شكلٍ ونوعي
عاداتنا والرزق من عالم الغيب=هذا وانا ابخل واحدٍ من ربوعي

فجاء سعد بالقدوع والقهوه وقال غاضبا
:

اقدع عسى يقدع على راسك الذيب=في خايعٍ مابه من الناس دوعي
متعطلٍ بالبر قبلي تناقيب=من ليلة الجمعه ليوم الربوعي
ومروك ناسٍ غايب عنهم الطيب=وخلوك وحدك في مكانٍ يروعي
مرحوم ياعودٍ كسا راسه الشيب=هنديته تذرف عليه الدموعي

,,,,,,,,,,,,,,,,,,,,,,,,,,,,,,,,,,,,,,,,,,,,,,,,,, ,,,,,,,,,,,,,,,,,,,,,,,,,,,,,,,,,,,,,,,,,,,,,,,,,, ,,,


قد يسبب الغزل حادثا داميا كالذي حدث لهذا الشاعر
:

يا بو ندى ويلاه ماغير اوني=مكدتي صارت عليّه خساره
اكد عبري مير هن ضيّعني=بالشارع الفرعي يمين العماره
نويت الف وشفتهن واخرزنّي=اربع بنات وصاحبك بالغماره
مريت ابيهن ياولد يشّرني=عيّن وانا ياخوك مامن جساره
قويت قلبي مير ماهرّجني=علكت من غيض الجمر والزقاره
بغيت اسولف ياخلف واسفهنّي=وطرت عبري والمناوي دشاره
ياحيف شفني مابقى غير سنّي=وعكازةّ صارت عليّه عياره
بدون ذنب بزينهن دودهنّي=اعدمت ضايع وموترين واشاره

------------------------------------------------------------


تعرض الشاعر عبد الله السلوم لموقف لايحسد عليه عندما وجد ونش المرور يجر سيارته الجديده
بدون أي ذنب اقترفه وهاهو يحكي لنا الامر بالتفصيل
:

لقيت الونش يسحب موتري في ساحة الديره=ركضت وقلت:يا سواق خبرني وش الجاري
انا ماخطيت بالماقف وتخطيطه وتنميره=وش اللي خصصه بالجر علمني وش الطاري
خزرني بالعيون الصفر واسرع لي بتكشيره=يقول اني سحبته ياقليل العرف بخياري
وقفت ارجيه كني عبده اللي طايله خيره=وهويضحك مثل مايضحك فليحان بمكاري
مشى قدام وجهي مانشد عني عسى قيره=يصلّب في مكانه لين يذري فوقه الذاري

وتستمر الحكايه الى قسم الشرطه حيث دفع الشاعر الغرامه واترد السياره:

دفعت اللي طلب مني وحطـه بتقريـره =رجعت بموتري للسمكره لو توني شاري

وهذه قصيده لشاعر وحداني سخّر معلوماته في مجال الحاسب الآلي في قصيده وضع
من خلالها اسسا تكنلوجيه لتطوير علاقة الحب التي يمر بها ويقول
:

نويت استعمل بحبك نظام الحاسب الآلي=نويت ادخل برامج ملتقانا كل عصريه
نظام ادخال يحفظها بلا تزوير واشكالي=على دسكٍ كما لو كان مطبوعات صوتيه
حقوق الطبع تحفظ لي بالاول وانتي يالتالي=واحذّر من اعادة نسخها نسخات عاديه
لاني ما قدرت اجمع حروف الحب يالغالي=خصوصاً لاتكلمتي بطريقه بهلوانيه
جمعت ولاطرحت وصار ناتج قسمتي خالي=وانا نسبة نجاحي بالحساب اثنين بالميه

وهذه قصيده للشاعر عبدالله اللويحان عندما زار اسبانيا لعلاج عينيه وبعد شفائه مضى يمتع
نظره فيها ويمتدح امانة اهلها مشجعا على السياحه قائلا
:

باسبانيا ياما نظرنا من الزين=وين انت ياللي تو عجّة شبابه
اوقف على الشارع ضحى يوم الاثنين=تشوف زينٍ ما يعدد احسابه
اشكال واجناس كما شرّد العين=هاك الخشوف اللي طوالٍ ارقابه
الا ومع هذا من الغدر امينين=نزيلهم كنّه من اقرب اقرابه
يظهر من الغرفه ويرجع بعد حين=والله فلا تلمس مخابي اثيابه
سيراتهم حلوه وهم مثل حلوين=لاتسمع الشحذه ولابه انهابه

لعب الامل واليأس مباراة في كرة القدم داخل قلب الشاعر سويد العنزي من عرعر
وهو يقول معلقا على هذه المباراة
:

امس العصر كان الامل يشكي الياس=في ملعب الاحزان داخل فؤادي
صارت فعاليّات واصبحت انا الكاس=والظاهر ان الياس اقوى النوادي
يوم العبوا في ملعبٍ كله امواس=لياس يلعب والامل حيل هادي
والياس سجل قوول والضد محتاس=من كورةٍ مخطوفةٍ بانفرادي

وهذه قصيده للشاعر عبدالله البراك يخاطب بها صديقه سعود حين شاهد فتاة غنيه
وتذكر حالتهما الماديه وقال
:

فوق الشبح ياسعود حطت ايديها=وانته وانا يا خوك نكشخ ابنيسان
انا اشهد ان الوقت مرهي عليها=ماهو بمثلك في هوى الدين غرقان
وانا ادري ان دنياك بلشان فيها=لاوفيت ديّان تذكرت ديّان

منقووووووووووول


ارجو ان تنال اعجابكم