كريم يا مزنً ترازم رعوده

كريم يامزنً ترازم رعوده

كريـم يامـزنً تـرازم رعــوده
وبله من الجنة وبرقـه مـن النـار
يبـرق ويرعـد والهبايـب تقـوده
وبقدرة المولى معـه عـج وغبـار
وجه على ضلـعً عسيـره حيـوده
ضلعً على الدنيـا والأيـام صبـار
ضلعً على الراقي عسيـرً سنـوده
شامخ شموخ طويق ودقس وسنجار
لديت يمـه قمـت أخيـل حـدوده
لكـن يابعـده وياقـرب الأنظـار
وأبغي فحيمان الحجـوري يـروده
ويجيب عن وقع المطر كل الأخبار
لاصاريعرف نقص علمـي وزوده
اشره عليه ولانبـي منـه معـذار
أصل الخيال وخيلـه يابـن عـوده
وليا ثبت بانشدك عن بعض الأسرار
أسرار عن جملة رمـوز معـدوده
شرقً وغرب وفوق ويمين ويسـار
من ضمنها بيـتٍ طويـلً عمـوده
يسلم به السالم ويوخـذ بـه الثـأر
وفي ربعته عودً متينـه عضـوده
عساه دايم مـن طويليـن الأعمـار
ومن ضمنهـا عـدً تزاحـم وروده
عيهل ولا له غير مارد ومصـدار
ومن ضمنها قرية كريـم محسـوده
في وسطها بيتين ماجتهـا ألانـوار
ومن ضمنها رجال يشعـب قعـوده
يمسي بدار ويصبح الصبح فـي دار
وقت الرخـا دايـم تقـادح زنـوده
وتضيع هقواته ليـا صارماصـار
ومن ضمنها زرعً قديمـه عهـوده-
بين الثريا والثرى نسـل الأشجـار
ياطيب مزرعته وياطيـب عـوده
من عهد سيدنا محمـد والأنصـار
والرجل ما يصعب عليـه ويكـوده
الا السوالف مع ضعيفين الابصـار
وانته ولـد حـرً عريبـه جـدوده
عندك ولك شيمه وحشمـه ومقـدار
والشعر في مجنـاه تقطـف وروده
عاقل ولك بالشعر خبره ومشـوار
والصدق ماتطلـب عليكـم شهـوده
والكذب ماله معك مدخل ومظهـار
وأسلم سلم حظك وطالـت سعـوده
والله يجيرك من بلا الوقـت لا دار
وعسى حبال الشر عنـك معقـوده
يامكرم الطرقي والاصحاب والجار

الشاعر/رجاالله بن فرج المحمدي {رحمه الله}