كاتب معزي العنزي يمدح جيرانه الفرده أهل خصيبة

بسم الله الرحمن الرحيم
هذا ماقاله (كاتب معزي العنزي) بجيرانه الفرده أهل خصيبة عندما جاورهم ورأى منهم إكرام الجار
وحسن الجيرة وقال هذه الأبيات المتواضعة التي تعبر عن نفسها تمجيداً لهم ..

أولاد راشد كانفين على البيت=اللي يمين البيت واللي شماله
واللي خلاف البيت واللي على البيت=والكل منهم قام يفاهق دلاله
واروح محشوم واذا جيت حييت=سلاله ياحيهم من سلاله
هذا ولد عم على ماتمنيت=وهذا ابناخله وهذاك خاله
اخص جيراني عليهم تشافيت=دلهت معهم وقت ولازلت داله
مدلهين الجار يمشي على هيت=ومن حلوهم للجار ينسى عياله
يا سعد حظ اللي سعوا له بتثبيت=ويا قرد حظ اللي سعوا في قتاله
عدوهم يسقوه مر وحلاتيت=وصديقهم يشرب قراح زلاله
حلوين مرين عتات شحاتيت=واشد لهم بالطيب لياجا مجاله
وبن حسن من الرجال الزناتيت= بالجاه والمعروف كم حل قاله
له كرمةٍ يشهد لها الحي والميت=وله كرمةٍ يشبع بها من عناله
سبيل الطريبيل ياحي ما اطريت=صينيته كلت نصيفة حلاله
وهلال أبو سلطان لجاله تلاجيت=جيته وانا مزنوك مثل الدخاله
سويت ماسويت كنيت وابديت=أبو سلطان الله يسعد قباله
وسعود وعايض حددوا لي بتوقيت=اللي يعوزك ندركه بالكفاله
وعشيري المطنوخ ألين من الزيت=وأحد من السيف المصقل بحاله
حلوٍ ومر وقرم وقاسي وعنتيت=هو الأول ليا جا نهار الصياله
أولاد راشد ما بهم قرن خرتيت=واصفا من المحار بعد انعزاله
جاهم الفراوي هالك لابس السيت=ومن عندهم قفا غني بماله
قالوا هلا بك يالفراوي ليا جيت= رجال الشهامة عجلوا بالنزاله
حذر أبن حماد كلمة وتصويت=عن خطبة النسوان ذعار قاله
اعد ما واجهت وأقول ما اوحيت=أكثرهم ما اعرفه وصلني نواله
يا طيبهم ما تلحقه لو تقاصيت=ورديهم راعي الطيب شاله
والطيب لأهل الطيب ياعالي الصيت=وإلا الردي خله يولي بفاله
صلاة ربي كل ما اصبحت وامسيت= على نبي مرسل بالرسالة